首頁 arrow 綠色短評 arrow 咱無愛聽in「通通氣」!

咱無愛聽in「通通氣」! PDF 列印 E-mail
發表者 李南衡   
2010/11/19, Friday
        十一月十三,台灣APEC領袖代表連戰,kah中國領袖胡錦濤APEC會後會面ê時,中國國民黨kah中國共產黨chit兩個雙生仔黨,以一貫黨比國khah大、黨就是國ê黨國體制觀念,一個稱呼對方總書記、一個稱呼對方榮譽主席,兩個按呢teh爽、爽kahhai-hai

 

        連戰轉來台灣了後,講tio̍h關係台灣佇國際上ê活動空間,講伊用北方土話向胡錦濤表達伊ê立場,無管啥款ê途徑,m̄-thang kā台灣擲落佇外面。」連戰講胡錦濤當時回應講,真濟代誌,「通通氣tio̍h好。」

  

        真濟年前bat kah幾個朋友去一間古廟跟老師父學坐禪,坐點外鐘了後,對自了m̄-bat坐過禪ê阮來講不止thiám頭、雙腳攏麻去、伸直。老師父問阮初次坐禪ê心得,一位教授應講:師父,我拄chiah坐禪坐kah放屁!害阮逐個攏擋bē-tiâu煞大聲笑出來。老師父用誠嚴肅ê表情指教授講:「你通ah!」啥物通ah?當然是氣,氣通ah

  

        按呢咱tio̍h知,中國國民黨kah中國共產黨若teh「通通氣」ê時,tio̍hteh講一寡臭屁話、teh放臭屁,咱tiohkhah風尾一下,才bē hō͘ in ê屁臭死去。

  

        十一月十七,參加廣州世運ê台灣跆拳道選手楊淑君kah對手越南選手拚到九比零ê時,裁判忽然間喝停,講楊淑君「失格」,違反大會規定穿無合格ê電子襪,楊淑君坐佇比賽場哭離。明明檢查通過了才入場比賽,是按怎比賽中臨時喝停判伊「失格」、使koh參賽咧?真正失格ê應該是咱楊淑君聯手做掉ê韓國kah中國,hitê金牌果然是中國選手奪去。

  

        台灣體委會副主委陳顯宗第一時間表示講:無管按怎裁判無公平,「咱tio̍h吞落去」。陳副主委啊,你何mih苦按呢「通通氣」咧?

  

        為tio̍h回應咱代表團ê抗議,世跆盟特別開一場記者會來說明。結果因為答覆內容有問題,台灣記者提出質疑,世跆盟中國翻譯人員無beh翻譯,引起台灣記者抗議講:「按呢敢有公平?」「阮是來chiachiah-ê屁話!」中國記者罵講:「恁ê素質那會按呢?」「中華台北是來亂ê!」兩旁相嚷,台灣媒體團結起來集體退席,表達抗議。

  

        咱台灣記者若是mài講:「阮是來chiachiah-ê屁話!」改作講:「阮是來chia聽恁通通氣!」用in胡錦濤主席ê話來應in,中國記者是tio̍h會講台灣人ê素質有夠懸?台灣人有夠高尚?

        咱應該hō͘中國國民黨kah中國共產黨知影,咱台灣人無愛聽in「通通氣」!

 
< 前一個   下一個 >