首頁 arrow 綠色短評 arrow 連勝文銃擊案疑雲重重!

連勝文銃擊案疑雲重重! PDF 列印 E-mail
發表者 李南衡   
2010/12/03, Friday

        五都市長市議員選舉前一暗ê十一月二六暗時八點十七分,新北市市議員候選人陳鴻源造勢晚會,連勝文佇台頂hō͘一名烏道角頭林正偉近距離拍銃,送台大病院急救。藍營造勢晚會ê助選員kah偏藍ê電視台,一直講「用選票來制裁暴力!」等暗示ê言詞、甚至造謠講連勝文是佇台北市長候選人郝龍斌ê場助講了落台hông拍銃拍tio̍h頭腦,激發藍營支持者隔日出來投票。大大影響第二工ê選情。選舉了,逐家才開始檢驗chit-ê銃擊案那會有chiah濟疑點?

 

        是按怎連勝文去郝龍斌ê場了後,續落去那會無去朱立倫ê場,顚倒去市議員細場ê造勢晚會?報導講伊原本無計劃去為陳鴻源ê場,是臨時接tio̍h電話才去ē,到底是啥人臨時邀請連勝文去tu銃子?

  

        銃手事先有講若無解決早前ê錢項,beh佇陳鴻源選舉場hō͘伊好看,所以伊才會揀「大腳ē」來修理,甚至傳出來講原本銃是beh拍洪秀柱。佇陳鴻源ê選舉場猶有啥人比陳鴻源本人khah「大腳ē」?揀啥物「大腳ē」敢無奇怪?

  

        銃子ùi連勝文倒旁嘴phé拍入去ùi正旁太陽穴邊出來,是ùi下向上拍,是按怎銃子會se̍h彎拍死台仔腳ê觀眾黃運聖?報導講銃子拍tio̍h連勝文有彈tio̍h碇骨頭,所以銃子才會se̍h彎走對台仔腳去拍死黃連聖。若彈tio̍h碇骨,連勝文敢有可能恢復hiah緊?警檢單位敢免公布銃子路徑圖?是一枝銃á是兩枝銃?一粒銃子á是兩粒?是按怎掠tio̍h兇嫌馬面林正偉是前竹聯幫愛堂堂主劉振南,是按怎伊比台頂台腳助選人員kah警方人員腳手攏khah猛?伊人徛佇位?

  

        第一時間,連戰辦公室主任丁遠超講,連勝文êbē-tàng白流,伊向警政署提出呼籲,tio̍h馬上去掠犯罪行為ê「集體共同嫌犯」!chit銃害綠營嬴嬴棋行kah輸,當然是綠營舞ê,事實上綠營hit號才調。「集體」是指啥?丁遠超雖然無講出來,應該心內有數。目的就是beh kā原本綠營有可能嬴三都、四都、甚至五都ê選局反盤,是賭博ê組仔頭?á是藍營?á是紅ê阿共ē?有人懷疑講,若是紅êē,是按怎重要證人之一、陳鴻源競選總幹事杜義凱急去中國創啥?有偌要緊ê代誌bē-tàng用電話、用傳真、用銀行滙款等無法度解決,一定tio̍h親身去中國?兇嫌林正偉行兇前有拍兩通電話hō͘杜義凱一通hō͘ê司機,兇嫌林正偉hông掠去了後,原本無杜請ê律師伊無beh接受夜間審問,杜勸了才接受。Chiah呢重要ê證人tī chiah要緊ê時陣會táng自由出國,警檢單位敢無責任敢無失誤?chit-ê銃擊案無真相,全台灣ê人民敢驚惶?連戰chit口氣敢吞會落去?

  

        疑雲一塊疊一塊,馬政府若無趕緊真正破案,保證馬英九面會烏去!

 
< 前一個   下一個 >