首頁 arrow 綠色短評 arrow 孔子和平獎頒hō͘連戰?無好笑!

孔子和平獎頒hō͘連戰?無好笑! PDF Print E-mail
Written by 李南衡   
Saturday, 11 December 2010
        十二月初七新聞報導,中國有一個團體叫作「文化部中國鄉土傳統藝術傳統文化保護部」,最近設立一個「孔子和平獎」,決定第一屆得主是台灣前副總統、現任中國國民黨榮譽主席連戰,因為連先生「為兩岸搭起和平橋樑」。會hông想講是十二月初十挪威beh頒諾貝爾和平獎hō͘中國異議分子劉曉波,thiau故意前一工ê十月初九頒發「孔子和平獎」。初九佇北京舉行頒獎典禮,連戰無去,主辦單位叫一個五歲查某囡仔代表領獎,講是連戰無可能反對和平、無可能反對和平獎,連戰妝siáu kah chit款!中國kah台灣ê網友真難得有仝一個反應:chit齣鬧劇敢傷過好笑!

 

        是按怎講無好笑?第一,中國現此時有裝一千五百粒以上ê飛彈向台灣,chit號國家有啥面thang去設立一個啥物「孔子和平獎」?明明是beh害已經死二千四百外年ê孔子koh氣死一遍!第二,chit-ê獎本身kah第一屆頒發hō͘連戰,雖然是一個笑話,但是一點仔都無好笑!

   

        咱攏猶會記得,二00二年十一月台灣阿扁總統喝出:台灣中國,一旁一國!中國有小可驚tio̍h,不過in想講等二00四年台灣總統大選了才來講,in ê算法是按呢:二千年大選選輸ê中國國民黨連戰鬥親民黨宋楚瑜,兩個票加起來一定會比阿扁khah濟,無疑誤hō͘阿扁拚嬴連任去,中國才大大緊張起來。趕緊二00五年三月十四由中國第十屆全國人民代表大會制訂通過「反分裂國家法」,第一遍明確提出,佇三種情況之下:台灣ùi中國分裂成作事實,將發生可能致使台灣ùi中國分裂ê重大事變,以及和平統一ê可能性完全喪失。任何一種情況發生,中華人民共和國tio̍h會使用非和平方式來達到國家統一。Chit-ê法一下訂出來,隨時引起自由世界極大ê 反對kah批評,講chit-ê法違背維持台灣海峽和平隱定ê目標。in攏反對用武力解決台海問題!

  

        當中國頭人滿面全豆花ê時陣,總統大選落選佇總統府頭前鬧歸個月、連戰變kah攏無輦了後,二00五年四月二六,趕緊以中國國民黨主席ê身分,chhoā一陣人去送溫暖hō͘中國頭人,講是「和平之旅」、「破冰之旅」-中國國民黨hông踢出中國大陸以後,第一遍kah中國共產黨上高層ê會談。Chit-ê動作明明是teh kā全世界講:中國制訂ê「反分裂國家法」是正確ê!阮來kā in背書。

        中國設chit-ê「闡述中國人對和平看法」ê「和平獎」,第一個想tio̍h當然是面對中國一千五百粒飛彈攏無半句、乖乖跪佇土腳hit-ê純種ê中國人!頒獎hō͘連戰是中國公開teh洗台灣人ê面,是hō͘台灣人足受氣ê見笑代。一點仔都無好笑!

 
< Prev   Next >