首頁 arrow 綠色短評 arrow 會tang3直選,台灣人tioh8惜福!

會tang3直選,台灣人tioh8惜福! PDF 列印 E-mail
2008/01/21, Monday
        十二月二九,中國全國人大常會以全體一百五十六票否決了二0一二年香港實行普選e5可能性,而且講這是符合香港公眾整體及長遠e5利益。香港公眾整體及長遠e5利益,是啥人講e5算數?當然是香港人。今仔日中國中央無欲hou7香港人直選,那像全國人大委員長吳邦國所講:「權ti7中央。」koh一遍hou7咱看tioh8中國式e5民主:你是民、我是主。Chit款e5垃圾步,及以前中國國民黨ti7台灣e5做法,仝款仝款。這兩個雙生仔黨實在是無seng5免錢!
  一九九七年香港回歸中國統治以後,香港人就一直期待香港及世界自由民主e5國家仝款,ma7會tang3選出家己e5行政主管、及監督制衡行政部門e5立法機構-議會議員。可惜九七年到今仔日已經超過十年ah,行政主管猶是中國中央指定e5人、立法會議員一半由中央指定、另一半開放民選。借問,這那是啥物民主?這及殖民統治有啥差別?
  十二月十八,香港民主派就寫批hou7中國國家主席胡錦濤,要求及伊見面、來表達in e5意見,人連插都無插in。十二月二三開始,香港民主派成員絕食靜坐六工,表達in對二0一二年雙普選e5要求,也就是家己選行政首長及議員。In特別強調,這種行為是要求、並m7是抗議。等到十二月二九,中國中央否決二0一二年實行普選e5可能性,香港民主派人士夯布條遊街問講:「阮tang時才會tang3普選?」別號叫作「長毛」e5立法會議員梁國雄,ti7二九暝燒舊輦箍來抗議。Chiah個動作攏無khah choa7,比狗吠火車koh khah無效。因為中國中央欲按怎做就按怎做,管待你香港人按怎想。「麻薯手內出」,我按怎掟、按怎捏,是我e5自由我e5權利,及恁香港人講啥想啥攏無關係!

  不過,中國中央ma7知影「放屁安狗心」e5重要,所以有講:二0一七年會使hou7香港人普選特首(香港特別區首長),但是候選人tioh8由提名委員會決定,就是講,由我來提幾個名hou7恁選。香港特首曾蔭權講,希望二0二0年會tang3選立法會議員。這意思是講,香港回歸中國二十年後,有可能hou7香港人選家己e5行政首長,二十三後有可能ho7香港人家己選議員。

         咱台灣人會tang3選家己e5總統、選家己e5立法委員,全世界ma7無真濟國家有chiah 民主nehchiah個權利並 m7是天落落來e5,是濟濟咱e5民主前輩拼死拼活得來e5。咱每一個台灣人ti7今年選立法委員及總統副總統e5時,愛特別寶惜咱有chit種權利,台灣人tioh8目睭peh hou7金,善用咱chit個權利,好好選出真正欲為台灣拍拼e5人,按呢才會tang3表現出台灣人知福及惜福!

 

    

 
< 前一個   下一個 >