首頁 arrow 綠色短評 arrow 咱beh用tó一枝嘴罵人?

咱beh用tó一枝嘴罵人? PDF Print E-mail
Written by 李南衡   
Tuesday, 21 December 2010
        十二月初九新聞報導,歐洲聯盟執行委員會宣布,亞洲LCD面板製造商違反「反托拉斯法案」,tio̍h繳六億四千九百萬歐元、差不多新台幣二百五十九億罰款。罰款對象包括台灣四間面板廠-友達、奇美、華映、彩晶,kah一間韓國廠-樂金。台灣四間tio̍h罰四億三千三百萬歐元,差不多是新台幣一百七十三億,其中奇美罰上濟歐元三億、差不多新台幣一百二十億。會hō͘人受氣ê是chhoā頭ê韓國三星去作密告者jiàu-pê-á煞無受tio̍h處分、免罰錢。

        咱經濟部第一個反應是三星按呢做足無道義-那像是講「盜亦有道」(做強盜有強盜ê規矩)。講chhoā頭ê人去密告,好lah,將來相拄會得tio̍h。台灣民間ê反應是:反韓ê情緒koh夯起來、叫逐個mài買韓國貨來表示抗議!網友發動拒買三星產品!Che攏是情緒性ê言詞kah行為,無啥可取。

        咱應該問ê是:咱chit幾間面板廠到底有違反「反托拉斯法案」á無?若確實有違法,hông罸錢那有啥話通講咧?beh受氣啥!

        「反托拉斯法案」(Antitrust Law)就是「反信託」、「反攏斷」,為tio̍h阻止「反競爭行為」、「反無公平ê商業行為」ê法律,簡單講就是反對企業聯合起來價數出自in喝懸喝低,傷害tio̍h商業環境、kah損害tio̍h消費者權益ê行為。一般是由政府機關ê競爭管理監督部門來負責監管。所以,佇美國á是歐盟,公司之間ê任何商業á是社交行為,見若有牽涉tio̍h議定價數ê行為,攏算是違反「反托拉斯法案」。攏tio̍h受罰款甚至tio̍h判刑hông掠去坐監。

        咱台灣企業若beh真正行向國際,每一間公司攏tio̍h加強法律教育訓練,將反托拉斯法案ê課程排入去,徹底瞭解世界各國反托拉斯法案ê規範kah程序,才bē koh去踏tio̍h地雷。存心投機,無可能定定好狗運bē hôngtio̍h。行正途,「反托拉斯法案」才那像魔神仔永遠toè tiâu-tiâu

        tio̍h密告者jiàu-pê-á,咱刑事警察局teh辦兇殺、搶劫、毒品走私等重大刑案ê時,敢是直直呼籲涉嫌者緊出來作「污點證人」,會tàng減刑甚至免刑無罪?咱罵kahphu̍t-phu̍t hit-ê韓國三星敢是咱刑事警察局teh鼓勵ê hit號「污點證人」?咱看特偵組teh辦前總統阿扁案ê時,敢無威脅á是利誘涉嫌者緊作「污點證人」來咬阿扁前總統?

        一個鼓勵人作「污點證人」ê政府,無盡提醒企業tio̍h守法ê責任,顚倒罵別國作「污點證人」ê公司是告密者jiàu-pê-ákoh講將來相拄會得tio̍h。借問,咱那有hit號面罵人?咱beh一枝嘴罵人?

 
< Prev   Next >