首頁 arrow 綠色短評 arrow 中國撤飛彈?台灣to̍h的確等!

中國撤飛彈?台灣to̍h的確等! PDF Print E-mail
Written by 李南衡   
Friday, 24 December 2010
        今年九月二一至二二,中國總理溫家寶去紐約參加聯合國會議,二二、順煞佇紐約kah華文報紙社長、總編輯等負責人見面座談,佇回答中國撤除對台灣佈署飛彈問題ê時,溫家寶講:兩岸和平發展ê形勢tī chit兩年ê表現,會使講是上蓋好ê時期。Che mā 反應tio̍h海峽兩岸人民ê願望kah要求,其實反應tio̍h中國kah遍布佇全世界十外億中華兒女ê願望kah要求。我想,你提出撤除飛彈chit-ê問題,最後會得tio̍h實現。

 

        以前有人講笑,一個查甫人數想beh kah一個查某囡仔約會,hit-ê心內無意愛ê查某囝仔應講:你toh的確等!hit-ê查甫人聽了真歡喜、hit暗有影toh去「竹腳」等,戇戇佇竹腳飼蠓,beh那等有咧!

        tio̍h中國總理溫家寶chia-ê話,咱ê總統府竟然表示講,對「大陸方面以台海和平kah區域安全ê角度釋出政治善意,表示肯定之意。」咱實在知總統府那會曉想,tī chit陣兩岸和平發展形勢表現了上蓋好ê時期,中國都無beh撤除向台灣ê一千五百萬粒飛彈,講最後會得tio̍h實現,竟然會相信!總統府有影戇kah bē扒癢?總統府是是明知中國是teh講漫畫(bàng-gah)m̄-koh tio̍h專工講hō͘台灣人聽、騙台灣人,講講tio̍h煞?

        Koh khah戇ê是一個名叫作賴幸媛ê查某人,伊若是單純一個查某人,按怎戇有伊ê自由。問題是伊是當今台灣政府負責kah中國事務關係上懸ê官員-行政院大陸委員會主任委員,竟然講:咱政府一直認為,原本就是大陸方面應該tio̍h做ê,是單方面會tàng做ê,台灣全部人民攏希望會tàng早一工實現。

        十二月底,中國海協會會長陳雲林來台灣參加第六遍江陳會,十二月二一,陸委會主委賴幸媛kah陳雲林「門關起來茶會」,賴幸媛事後講,伊chit遍是第三擺向陳雲林提出「中國應該主動撤除飛彈」ê要求。陳雲林果然是武林高手,拍太極拳拍khah chiahsúi,伊講:tio̍h愛坐落來商談解決。講tio̍h那像in兩個一直徛the商談,賴幸媛無請人客坐。

        十二月二二,陳雲林chhoā hit陣協商代表團飛轉去北京,中國對台辦主任王毅親身去機場迎接,講起中國撤除飛彈問題,老先覺王毅講了上清楚,伊講,假使台灣願意商談,大陸也願意積極商談,但是時機猶無成熟,雙方會使漸漸創造條件了後再來談。

        中國總理溫家寶講中國撤除向台灣ê飛彈,chit-ê問題最後會得tio̍h實現。最後是tang時?鬼知影!台灣toh的確等!

 
< Prev   Next >