首頁 arrow 綠色短評 arrow 白賊九講白賊teh招伴

白賊九講白賊teh招伴 PDF 列印 E-mail
發表者 李南衡   
2011/01/03, Monday
        十二月二七新聞報導,前無偌久馬英九總統接受媒體專訪ê時表示,假使民進黨主席蔡英文若承認「九二共識」,兩岸關係tio̍h會陷入無確定狀態。白賊九講白賊有招tio̍h伴,中國隔海贊聲講:堅持「九二共識」是兩岸建立政治互信ê重要基礎,是兩岸關係kah發展ê前提kah基礎。

 

        咱攏知影,1992年台灣海基會kah中國海協會兩會會商了後,一直到2000年總統大選了換民進黨執政,拄beh落台ê中國國民黨政府陸委會主委蘇起發明一句「九二共識,一中各表」進前,無論佇台灣á是佇中國,攏無人bat聽過chit句話。阿扁總統就任了後聽tio̍h mā驚一跳,有去請教1992年ê總統李登輝kah當時參加辜汪會談ê海基會會長辜振甫,in兩位攏講無hit號啥物「九二共識」。八年後才忽然間出現chit句怪話,逐個攏感覺真奇怪。

        Che那像一男一女,八月十五,查甫講伊誠意愛chit-ê查某囡仔、想beh kah 伊結婚,chit-ê查某囡仔講伊完全無意愛kah chit-ê查甫、根本都無想beh kah伊結婚。發明家蘇起聽tio̍h,隨時宣佈講chit對男女「八一五共識,各人講各人ê話」。你若問發明家蘇起,in兩人位有共識?蘇起真有可能應講:兩人合,chit點就是共識。兩人有一個共識,就是兩人無共識。伊講按呢、你敢聽有?簡單講兩人無共識,那像講「九二無共識」,敢khah明白khah清楚咧?

        原本中國hitmā m̄知「九二共識」是啥物碗糕。聽中國國民黨解釋才知影原來「九二共識」會使解釋作「一個中國」!那有chiah好孔ê代誌!中國共產黨緊順中國國民黨ê嘴尾,講想起來ah1992hit陣確實有「共識」一個中國!中國國民黨講白賊,加chhoē一個中國共產黨做夥講khah有力!

       

        In中國人有一個真bái ê劣根性,想講一個白賊若講久,講kah連家己都會相信,按呢hit-ê白賊就會變作是白賊、愈講愈sêng真ê;若是愈濟人講、想講效果tio̍hkhah好。親像第二次世界大戰末期,美國總統、英國首相kah中國國民政府主席佇埃及開羅開會,明明是一個新聞記事,中國國民黨政府硬講作是改變台灣命運ê「開羅宣言」,而且囥佇小學中學課本內面來教。連中國共產黨鬥陣講白賊講chham落去,誠好笑誠悲哀!

        Chit遍馬英九直直beh迫民進黨kah民進黨蔡英文主席tio̍h愛承認「九二共識」,chit種心態。馬英九講「九二共識」講kah hō͘台灣人(kí) kah托,講白賊講kah有小可心虛ê款。

        按呢你toh知影,是按怎白賊九講白賊teh招伴!

 
< 前一個   下一個 >