首頁 arrow 綠色短評 arrow Kā chit粒惡毒ê日頭射落來!

Kā chit粒惡毒ê日頭射落來! PDF Print E-mail
Written by 李南衡   
Friday, 07 January 2011
        2011年元旦升旗典禮,總統府頭前有真濟人夯國旗teh慶祝中華民國建國百年,人群中有一陣人khah特殊,是一群泰雅族勇士kah部落ê人,inchia beh延續族中長老所講ê「射日傳說」。in控訴無仝ê外來政權侵佔in原住民土地。beh kā全國同胞kah中華民國政府講:阮拒絕中華民國政府「精彩一百年」ê講法,因為「精彩百年」是踏tio̍h泰雅族kah各原住民ê血才建立起來ê。對阮來講,是悲慘ê一百年,是hông欺侮ê一百年,是hông踐踏ê一百年,外來政權用in ê法律追捕阮ê族人,侵佔阮ê土地,剥奪阮ê權利,中華民國用霸凌ê手段hō͘阮ê自然主權消失去。In應該公開向阮原住民會失禮,自然主權還阮!

        泰雅族ê「射日傳說」是講:古早古早,天頂有兩粒日頭,天氣非常熱,草木枯焦(ko͘-tâ)、溪溝無水、農作物無法度生長,人民真痛苦。族人參詳,tio̍h kah一粒日頭射落來,所以決定beh去遙遠ê日頭hia kā日頭射一粒落來。In知影無可能家己有限ê生命中完成,所以每人背(āiⁿ)一個嬰仔出發,年久月深,勇士一個一個老去、死去,當年ê嬰仔已經成作大人,繼續向前行。有一工真正行到日頭ê所在,弓giú滿,合齊箭射出去,其中一粒日頭射落來!

        今仔日,chit粒日頭霸佔in ê土地,侵佔in ê自然資源,烏白剉in ê森林,chit粒日頭侵佔in ê溫泉,才koh歸ê賣hō͘財團去開發。In決意beh kā chit粒日頭射落來,因為in beh維護in ê自然資源,自然資源是生生不息ê,chiah美好ê資源是behhō͘子子孫孫享受ê。chit粒日頭kā in ê天然山林變作惠蓀林場、八仙山林場、棲蘭山、太平山、大雪山等各森林遊樂區,攏拍歹了了、嚴重破壞國土;súi ê山林變成福壽山農場、清境農場;súi ê生活空間號名叫作啥物啥物國家公園,可惡ê是in繼續佇in祖先留落來ê土地頂面過in傳統ê生活;chit粒日頭佇美麗ê河川頂面起水庫,強迫水庫附近部落遷村到土地有嚴重污染ê所在,behin泰雅族kah其他各族原住民!河川、山林、地名甚至連in祖先留hō͘ in ê攏改作漢人名。

        目前佇立法院tng teh審查ê「原住民自治法」是空殼ê,原住民無土地ê權益、無法律保障ê權益、koh khah無原住民實質管理ê權益,chit款欺騙ê步數,對in原住民是koh khah大ê傷害。

        輪番控訴了,五位泰雅族勇士做夥用箭射掛佇總統府頭前Ketagalan大道路頂「國旗」ê「青天白日」部分,射了,將弓kah箭交hō͘五個細漢囡仔。希望一代一代按呢傳落去、抗爭落去,有一工一定tio̍h kā chit粒惡毒ê日頭射落來!

 
< Prev   Next >