首頁 arrow 綠色短評 arrow 中國人權律師ê下場!

中國人權律師ê下場! PDF Print E-mail
Written by 李南衡   
Friday, 21 January 2011
        一月十八至二一,中國國家主席胡錦濤去美國訪問,新聞焦點是胡主席kah美國Obama總統會談ê內容、對今後中美關係ê影響等等,中國人權律師高智晟佇美國ê牽手耿和,拜託Obama總統向胡錦濤表達關心高智晟,希望中國政府會tàng釋放伊ê翁婿高智晟,伊ê聲音消失佇白宮歡迎胡錦濤禮炮聲中。伊是2009年一月chhoā查某子kah後生偷渡去泰國,轉去美國得tio̍h政治庇護ê。

        高智晟是1966年出世ê陝西人。陝西北部榆林市政府tī 1994一寡欠缺資金kah技術開採ê油田,引進民間資本開發,等有生產量了後政府變面,2003年起開始強制收回油田,四十幾位石油投資者掠去遊街示眾、koh開批鬥大會,包括高智晟在內ê幾位替民營公司爭取權益ê律師掠去關。2005年七月,廣州市太石村發生嚴重財務問題,村民照法律提出罷免程序,區政府採取暴力手段、動用千名警力掠幾十個村民kah高智晟等幾位人權律師。仝年十二月,廣東汕尾市為tio̍h beh起大型發電廠,強制徵收一大片山地、田地,致使有四萬外個村民無厝thang住,雙方發生衝突,政府動用三千外名武裝警察鎮壓,海外媒體報導有二十人死亡、四十人失踨,是六四天安門事件以後,中國政府kah民眾衝突開銃拍死平民ê頭一件。替平民爭取法律保障ê合理補償kahtah ê人律師內底是有高智晟。2006年三月初八《大紀元時報》報導瀋陽市蘇家屯區遼寧省血栓病中西醫結合醫療中心,涉嫌關押六千外名法輪功學員,活體摘取器官來賣、koh kā屍體下落去病院焚化爐燒掉等非法行為。中國外交部發言人否認指控。高智晟公開表示伊有意向參與調查蘇家屯事件ê真相。

        親像高智晟chit種人權律師,中國政府那會tàng(lún)伊!白道ê政府掛烏道兄弟相續去擾亂迫害攏無法伊。無辦法,2006年八月十五,政府當局秘密掠去,九月廿一才以「煽動顚覆國家政權罪」ê罪名正式逮捕。十二月十二無通知厝裡ê人、無辯護律師ê情況下開庭審理。十四,美國國務院發表聲明有注意tio̍h高智晟案。十二月二一法院一審判決有期徒刑三年,緩刑五年。放出來了後,2009年二月初四,伊佇陝西厝裡hō͘警察掠去下落不明,聽講有受tio̍h相當ê苦刑,引起國際社會關心。2009年七月,美國德州基督教團體收集十萬人簽名,要求中國釋放高智晟。全世界teh關心失踨ê高智晟,2010年一月二一,中國外交部發言人馬朝旭講高智晟並無失踨,照中國法律伊應該佇toh就佇toh。四月初七,高智晟忽然間佇北京接受美聯社訪問講:我無力koh堅持落去ah!我需要平靜安寧。佇中國,維護人權ê律師tio̍h按呢hō͘政府踐踏凌遲!

 
< Prev   Next >