首頁 arrow 綠色短評 arrow 連勝文銃擊案結案,動機咧?

連勝文銃擊案結案,動機咧? PDF 列印 E-mail
發表者 李南衡   
2011/01/28, Friday
        舊年十一月二六,台灣五都選舉前一暗,中國國民黨榮譽主席連戰ê公子連勝文佇新北市議員候選人陳鴻源造勢台頂,hō͘馬面林正偉彈銃面tio̍h傷流血,一位佇台仔腳ê市民黃運聖tio̍h銃死亡。今年一月二一,板橋地檢處偵結,依殺人、銃砲、殺人未遂三項罪名起訴。殺人動機講是因為十幾年前牛埔幫老大永泰kah陳明雄之間有兩百萬土地開發佣金糾紛,馬面beh the̍h chit條錢,陳明雄攏無愛插伊,所以beh教訓伊ê後生陳鴻源,無注意誤殺tio̍h連勝文。制式九0手銃kah帶佇身上ê四十八發銃子,講是一個已經死去ê兄弟hō͘伊ê。

        起訴書見報了後,各路英雄好漢無人相信。綠色ê民進黨自一開始就懷疑中國國民黨政府藉chit-ê銃擊案hō͘選局反盤,原本民進黨真有可能嬴三都至四都、甚至五都總嬴ê勢面,煞莫名其妙無嬴,連選舉無效ê訴訟都提出á,當然無相信起訴書所講ê。藍色ê中國國民黨一寡人按怎看?連戰辦公室主任丁遠超案發第二工就講:會tàng看出che是集團預謀ê。看tio̍h起訴書了後,伊講十個人有十一個人相信,另外一個是有身ê婦人人腹肚底ê囡仔會笑死!中國國民黨前主席吳伯雄講:開銃認m̄-tio̍h人,無合常理;台北市長郝龍斌講:行兇ê動機kah手段無成比例;新北市市長朱立倫講:警方kah檢方辦案攏tio̍h注意「社會觀感」,希望檢方會tàng釐清案情;立委邱毅講che319以後上蓋大ê國際笑話!陳鴻源副議長講:幕後有藏鏡人;受傷者連勝文講伊無相信是誤擊,伊罵我六字經,而且阮兩人有當頭對面相對相一下,那有可能看m̄-tio̍h人!

        講看m̄-tio̍h人才是奇怪,連勝文身懸190幾公分、陳鴻源170公分,兩人差一粒頭;連勝文穿青衫、陳鴻源穿白衫koh phāiⁿ候選人紅布條;koh khah好笑是講馬面老伙仔目koh有散光,才會看m̄-tio̍h人。

        原本有人懷疑是烏道組仔頭驚民進黨嬴三都以上,會賠kah褪褲,才下手。路尾假那無人koh講起;陳鴻源競選總幹事杜義凱,m̄-nā案發進前馬面有拍三通電話chhoē伊,而且案發幾工後兇兇狂狂去中國,講是送牛奶粉錢,第二工緊koh轉來台灣。莫怪有人懷疑銃殺連勝文案是紅ê變 ê

        無人會去想講連勝文銃擊案是牽涉tio̍h女色ê桃色;無人會去想講牽涉tio̍h錢銀糾紛ê金色;綠色是無可能;看hiah濟中國國民黨ê大細粒官按呢罵,藍色假那無啥sêng。動機咧?所有辦案ê人第一個一定會問講兇手是按怎beh刣人,就是動機!幾種色攏是,莫非是白道用手術房teh用ê「無影燈」,一個案才會辦kah按呢無影無跡,無人愛信!

 
< 前一個   下一個 >