首頁 arrow 綠色短評 arrow 楊志良chit款第一名閣員!

楊志良chit款第一名閣員! PDF Print E-mail
Written by 李南衡   
Friday, 18 February 2011
        過年了辭掉衛生署長ê楊志良,因為伊ê公事包拍賣偌濟伊就beh相對捐偌濟作健保愛心專戶、上濟五十萬為限。拍賣五百萬koh九百箍,致使楊志良ê大名伊辭職了後猶佇各大媒體鬧熱滾滾。煞無人去問講伊五十萬敢有捐出來?koh khah無人去問講楊前署長任內ê功過敢免小算算一下?

 

        上蓋引起人關心ê是伊上台hit陣講ê大聲話:beh kā台北市政府馬英九市長任內所積欠ê兩百三十億健保費討轉來,到伊辭職猶無聲無說。因為收無tio̍h hit條錢,伊才會一日到暗teh喝講健保無起價健保會倒!伊敢真正hit條錢若收tio̍h健保免起價tàng加擋幾年?楊志良伊家己認為任內上偉大ê二代健保,舞到變作一個啥物都無sêng ê一種健保,伊煞講heinê版本。借問一下“in”到底是啥人?既然無合伊ê意,伊應該好膽拒絕才tio̍h啊!若立法院所通過ê二代健保kahê政策無仝,伊隨時辭職,逐個大聲伊喝讚!

  

        當H1N1新流感大流行ê時,伊講全世界攏欠疫苗,若有teh買、koh khah貴伊都beh買,所以一定tio̍h等候國產ê國光疫苗生產出來。人報伊外國位有teh買,伊才大嘴開開無話應人。疫苗注了有不良反應、甚至有人過身去,伊無好好作說明干單講攏kah疫苗無關係,才會引起人民驚惶敢去注疫苗。代誌已經過年外ah,伊beh離職進前才用衛生署ê名去告「大話新聞」主持人鄭弘儀kah六位常態來賓。有公權力ê衛生署就是因為親像署長楊志良一日到暗講beh辭職攏無影,講話才會無公信力,比媒體koh khah無人愛信,楊署長那會無感覺見笑?

  

        美國牛進口hit件代誌做到落氣落tak,伊敢真正認為ùi狂牛病疫區ê美國進口牛腹內、牛腦無問題?

  

        楊志良離職了後,程仁宏等三位監察委員才開記者會講:新型庫賈氏病(狂牛症)「極有可能病例」,一九九九年三月台北市某醫學中心通報,患者第二年五月死亡,衛生署疾管局到十二月初八媒體報導了才緊急對外說明。監察委員認為衛生署涉嫌隱瞞狂牛症疫情,提出糾正。Chiah嚴重ê過失無提出彈劾,莫怪人看監察委員無起!程仁宏監委問講:chiah呢重大ê代誌敢講副署長、防疫局長攏隱瞞署長?到底是衛生署內部管理出問題?抑是楊志良目睭掩lè teh做署長?

 

        舊年十二月,立法委員賴世葆講:根據政府部門內部未公開ê民調,楊志良一直攏是內閣閣員滿意度第一名,滿意度達到六成,實在真無簡單。逐個想看māi,若有影目睭掩lè teh做署長ê楊志良是內閣閣員滿意度第一名,chit號內閣偌àu你就知!吳敦義猶有啥物面繼續作行政院長咧?

 
< Prev   Next >