首頁 arrow 綠色短評 arrow 王將一陣風

王將一陣風 PDF Print E-mail
Monday, 21 January 2008

       Chit遍立法委員選舉,民進黨會「穿美國西裝──大輸」,有幾個原因:  

       台灣經過中國國民黨超過半世紀e5殖民統治,所實施e5教育,hou7真濟台灣人到今仔日猶未覺醒,in所累積e5資源,包括不當得tioh8 e5黨產,及建立起來e5人脈關係,解嚴了這二十年,每遍選舉,中國國民黨攏有法度提六成左右e5選票。也就是講,經過台灣濟濟民主運動前輩e5拍拼,到民進黨e5產生、執政八年,到今仔日,猶原只有四成左右e5票。

        孤對siah e5時陣,原本六四分e5選區,因為藍營大分裂輸、綠營大合作才贏e5。像講彼年台北市,藍營分裂出中國國民黨黃大洲及新黨趙少康,阿扁才有可能當選台北市長。阿扁市長任內認真拍拼,市政滿意度超過七成,意識型態作怪,阿扁連五成票都提無煞落選。二000年總統大選,ma7是藍營分裂作中國國民黨e5連戰及脫黨e5宋楚瑜,阿扁才提四十葩左右e5票當選,二00四年藍營大團結,中國國民黨e5連戰加親民黨e5宋楚瑜會使講穩e5,無想tioh8綠營koh khah大團結,二二八,阿扁總統及李登輝前總統chhoa7頭,台灣人徛出來、手牽手心連心向中國e5反分裂法「唱聲」,阿扁才小贏當選。

  Chit遍立法委員選舉是第一遍實施單一選區兩票制,一票選區域立委、一選區選一個,一票選政黨算不分區立委。chit遍民進黨不分區立委提tioh十四席、區域立委民進黨有提tioh8三十八葩幾、比頂遍khah濟、才提tioh8十三席。孤對siah就是按呢,輸一票就輸一席。中國國民黨得票數比民進黨khah濟十五葩,席次卻比民進黨加四點七倍,這是選舉制度e5問題。是按怎提chit個新選舉法e5時,民誰黨無堅持區域委員及不分區委員各一半,才khah接近民意咧?

    Chit遍啥物新黨親民黨攏無出來選區域立委,藍營大團結e5同時,khah無彩e5是綠營顛倒分裂,有幾個選區該贏e5選到輸,親講高雄市林進興害李昆澤落選、嘉義市台聯e5凌子楚害莊和子落選、雲林縣台聯e5尹伶瑛害劉建國落選。那無,民進黨加三席變十六席、中國國民黨減三席變五十八席,攏總民進黨變三十席,中國國民黨變七十八席、ma7輸一下khah無hiah歹看一絲仔。

  Chit遍猶一個問題是綠營e5頭人失策,阿扁總統臨時接黨主席,而且一個總司令家己落格去做「衝組組長」,全台灣衝透透,搶各候選人e5光彩。另外一個是李前總統,硬欲捒人出來選區域立委,hou7人感覺綠營大分裂,一寡淺綠e5選民看了ma7 sian,影響綠營e5士氣,無愛出來選。這兩位頭人e5作風,hou7我想tioh8一個感冒藥e5藥名:王將一陣風!
 
< Prev   Next >