首頁 arrow 綠色短評 arrow 菲律賓kā馬政府khau洗!

菲律賓kā馬政府khau洗! PDF 列印 E-mail
發表者 李南衡   
2011/02/25, Friday
        2010年十二月二七,菲律賓kah中國所組成ê一個專案小組掠tio̍h一陣涉嫌跨國詐騙嫌犯,內底有台灣籍十四名、中國籍十名。今年二月初二、舊曆過年hit工,菲律賓政府所有嫌犯攏遣送去中國,台灣駐菲律賓代表處the̍h菲律賓法院所簽發ê人身保護令去機場擋人,菲律賓政府無插伊,菲律賓馬政府洗面,台灣外交部提出抗議。馬政府宣布召回駐菲代表、beh嚴審菲勞來台灣ê簽證、審查期ùi十二工延長作四個月、取消菲國人士網路免簽來台等表示抗議。

 

        今年二月初九,菲國總統府文官長講,菲國遵守一個中國政策,嫌犯管轄之爭,應該由台灣kah中國恁家己去解決,菲律賓第二遍馬政府洗面。菲國司法部長表示菲國無可能向台灣會失禮,菲律賓第三遍馬政府洗面。菲國代理移民局長講,移民局無做m̄-tio̍h。面對台灣採取凍結菲勞、取消菲國人士免簽、召回駐菲代表等報復制裁措施,「只不過是一個威脅niā-niā。」菲律賓第四遍馬政府洗面。唯一對馬政府khah客氣一屑仔ê是菲國副總統兼菲勞事務顧問,伊講,希望台菲之間ê「誤會」會tàng真緊就化除,呼籲台灣政府m̄-thang將報復行動匟佇菲勞身上,「in只不過是為tio̍h生活做工ê艱苦人。」

  

        菲律賓派特使羅哈斯(Roxas)來台灣說明,照行政院吳敦義院長ê講法是:「來台應該道歉。」外交部長kah特使舞豬舞狗,舞十一點鐘才叫牛肉飯食,最後伊是無道歉,伊講:「外交部()部長有提起(要求正式道歉),但是我無得tio̍h chitê授權。」菲律賓恐驚台菲兩所在離傷遠,beh kā馬政府洗面洗(chiâu) tio̍h,派特使專工the̍h面巾來馬政府洗面,一遍洗外交部長kah行政院長兩個ê面。外交部楊部長真有可能嫌洗了無夠氣,人專工來台灣,那會使無馬英九總統洗一下面!所以特別安排馬總統接見特使。雖然馬總統一個面激臭臭,特使是真細膩馬總統ê面洗kah清氣溜溜:無beh道歉!

  

        特使轉了後,菲律賓無koh kā馬政府洗面,馬政府想講chit聲好食睏ah!無疑誤菲律賓總統Aquino三世koh-khah雄,伊講:「台灣要求阮道歉,但是佇chit-ê情況下,阮無認為有啥好道歉ê!」台灣放調講beh凍結菲勞,伊應講he是台灣ê權利,菲國mā bē-tàng按怎。菲勞會使去歡迎in ê國家,會使留佇國內就業。Che m̄馬政府洗面,明明是馬政府khau嘴鬚,khau kah流血流滴。

        奇怪,那會無聽馬總統哀一聲?因為che攏是伊家己做得來ê,馬總統就任以來一直強調「一個中國」,菲律賓講阮就是照「一個中國」原則teh做,佇一個中國下面,恁家己去chhiâu。馬政府hông khaubehsiáng

 
< 前一個   下一個 >