首頁 arrow 綠色短評 arrow Chiah-ê敢是咱ê波麗士大人?

Chiah-ê敢是咱ê波麗士大人? PDF Print E-mail
Written by 李南衡   
Friday, 04 March 2011
        咱會記得2008年十月,台灣電視kah三立電視共同播出一個以警察作主題ê連續劇《波麗士大人》,台視拜五暗、三立拜六暗,ùi十月播到翻轉年三月結束猶煞得,兩台隨時接落去無仝時間播出,台視一禮拜播四遍、三立一禮拜播五遍,播到六月才佇台灣煞戲,續落去換佇新加坡星和都會台ùi hit年年底播到第二年六月。偌呢受觀眾歡迎你想都知。同時,一般台灣人因為按呢對咱台灣警察ê印象加好真濟。

        無疑誤,才過兩年niā-niā,那會有一寡心術無正ê人,專工ùi中國來chia beh破壞咱台灣波麗士大人ê形象咧?

        新聞報導二月二七,北京第二度「茉莉花」活動期間,包括咱台灣三立新聞台兩位記者在內、有美國kah別國ê十外名外國記者,佇北京遭受tio̍h中國警察粗暴對待,in遭受tio̍h中國警察無仝程度ê非法騷擾,至少有一名記者hôngtio̍h傷,in ê採訪器材mā hō͘中國警察搶搶去,有幾位記者hông載去警察局拘留。咱台灣透過海基會向中國海協會交涉,咱二位三立新聞台記者才hông釋放。台灣人看tio̍h chit-ê新聞報導攏誠憤慨,講中國警察那會使chiah呢無法無天!想講:好佳哉,咱chia是台灣、是中國!

        台灣?你敢無注意才前一工ê代誌?二月二六暗九點左右,有一陣聲援中國茉莉花革命、包括台大、清華、政大、東海等大學ê二十外名大學生,前往台北市信義區beh去向中國代表陳雲林傳達中國民主化、政治開放等訴求。大約有四十幾名不明人士佇十字路口kā intioh、阻擋in向前行,雙方發生激烈相罵kah肢體衝突,造成一名大學生頭殼kah手骨鑢tio̍h傷。Chit中間,不明人士內底有一個放調講:恁信我會辦恁?阮teh執行公務neh!甚至有一位學生͘ in捒倒佇土腳哀哀叫ê時,一名不明人士喝講:「哀啥物?全部攏kā in掠轉去!」chiah-ê大學生當然想講chiah-ê不明人士是ùi中國來保護陳雲林ê,才會chiah呢雄蓋蓋、惡khia̍k-khia̍k!若是真正咱台灣ê波麗士大人,相信會穿制服來執行職務,準若無穿制服一定會the̍h出相關證件hông看一下。若是執行公務、beh指責chiah-ê大學生違反《集會遊行法》,敢免舉牌仔kah宣告三擺,依法處理?雖然咱實在對chit-ê惡法真爽!群眾無beh解散,警察才有權強制驅散,那會動bē-tio̍h就喝beh掠人?咱想曉,是按怎台北市警察局無顧tio̍h台北市波麗士大人ê名聲,放目容允ùi中國來ê一陣惡徒佇台北市街頭耀武揚威!莫怪hit陣大學生會一直大聲問講:「chia是中國嗎?」「chia是中國嗎?」

 
< Prev   Next >