首頁 arrow 綠色短評 arrow 按呢轟炸利比亞敢有道理?

按呢轟炸利比亞敢有道理? PDF 列印 E-mail
發表者 李南衡   
2011/03/25, Friday
        三月十九,美國、英國kah法國三國聯軍對利比亞發動飛彈轟炸空襲,理由是利比亞強人Gaddafi宣稱對國內反對派武裝停火了後,koh再攻擊͘反政府武裝占領去ê重要城市班加西(Benghazi),講聯軍發動軍事行動是為tio̍h beh打擊Gaddafi kah效忠伊ê武裝部隊,保護利比亞平民。

 

        美英法三國聯軍那像是「正義之師」、替天行道。講Gaddafi無應該用武力鎮壓反對伊ê利比亞人民、是犯tio̍h「反人類」罪,所以出戰機用飛彈修理。若chit-ê理由會通,平平是阿拉伯國家巴林(Bahrain) ûi今年二月十四開始佇各所在發生反政府示威,政府出動軍隊鎮壓,至少有四個人死亡、231人受傷、60人失踨。美英法三國敢有講按怎?今年一月二三開始,平平是阿拉伯國家也門(Yemen)首都有數千名群眾示威,反對執政者修改憲法͘伊家己會使無限期連任總統,政府派兵鎮壓,三月十八發生數十名示威者死亡ê流血事件。美英法三國敢有哼一聲?koh khahê 1989年六月初四,中國政府派出戰車kah軍隊鎮壓學生,到今仔日猶有濟濟ê「天安門母親」teh chhoēin ê囡仔,美英法三國敢有出聲?敢有派出軍機發射飛彈拍中國?

        美英法三國聯軍出動飛機發射飛彈轟炸利比亞,講是為tio̍h beh保護利比亞
平民。失禮,飛彈無生目睭,無可能干單拍Gaddafi本人、伊ê家屬、支持伊ê武裝平民。敢有可能平民若支持Gaddfi會忽然間變作是平民?聯軍攏總拍一

百六十二粒「戰釜」飛彈,絕對會拍死kah拍傷tio̍h真濟無辜ê平民。

        Gaddfi使用國家暴力機器以殘忍ê手段屠殺家己ê人民,違反尊重人道kah人權ê國際新規範。咱知,按呢當然m̄ tio̍h!借問一下,緬甸、北朝鮮人民生活敢有比利比亞khah好?利比亞國民所得美金一萬四千八百箍、排世界第五十六名,比緬甸美金八百箍、北朝鮮一千七百箍嬴過真濟;利比亞十幾年前就放棄核子武器,今仔日北朝鮮猶一日到晚威脅講beh試爆核子彈;利比亞無去攻擊別國,北朝鮮炸掉南韓ê天安號、炮擊延坪島。利比亞獨裁,緬甸、北朝鮮敢無夠獨裁?美英法三國聯軍那會無仝款夯牛刀去刣緬甸、北朝鮮hit兩隻細隻雞仔子?

        聯合國安理會1973beh表決禁止利比亞領空一切飛行、亦就是禁航區ê時,明知美英法三國會派飛機去轟炸,中國駐聯合國代表是按怎走去放尿變作棄權票咧?是是若否決,後遍中國若講beh拍台灣驚別國反對?若贊成,beh按怎全世界講中國是主張和平ê?一個偽君子敢有比三個真小人khah好?

 

        咱干單beh問一句:按呢轟炸利比亞敢有道理?

 
< 前一個   下一個 >