首頁 arrow 綠色短評 arrow 中國道德敗壞敢有救?

中國道德敗壞敢有救? PDF Print E-mail
Written by 李南衡   
Friday, 22 April 2011
        四月十三,中國總理溫家寶接見新聘任ê國務院參事kah中央文史研究館館員座談ê時有講起:Chit幾年來,相續發生「毒奶粉」、「瘦肉精」、「地溝油」、「彩色饅頭」等事件,chiah-ê惡性食品安全事件,會tàng表明,誠信ê缺失、道德ê敗壞已經到偌呢嚴重ê地步。伊koh講:一個國家若是無國民素質ê提高kah道德ê力量,絕對無可能成作一個真正強ê國家、一個受人尊敬ê國家。

 

        若是中國頭人第一遍講chit款話,咱聽tio̍h一定會真感動。可惜ê是,溫家寶總理本人kah中國國家主席胡錦濤,攏幾若遍bat提起「道德」chit-ê問題。「道德」問題那像是中國ê久年病,驚人會記得,三五年就theh起來餾餾一下,事實上「道德」問題是一年比一年koh khah嚴重、koh khah無醫!因為病毒早早就侵入中國人ê骨頭內底ah

        自古以來,道德就m̄-bat囥佇中國人ê心肝底、抑是佇生活中表現出來,道德干單寫佇文字頂面,表現佇講話內底niā-niā,所以才會有「滿嘴仁義道德」chit句話。續落去hit句話tio̍h真無好聽!

        原本佇中國算是真lámê道德,經過1966年至76年十年ê「文化大革命」凌遲,道德佇中國會使講變作那像是風中ê蠟燭直直beh hoa去。中國人家己講文化大革命是一場「大浩劫」,怨歎有偌濟智識分子自殺、有幾百萬人受苦受難、社會動亂、經濟發展退步等等。其實,對中國上損ê是:父子母女兄弟姐妹之間ê親情喪失,先生學生朋友之間ê友誼變無,人kah人之間bē-tàng mā m̄敢互相信賴,講白賊煞變作正常、講實話顚倒會hông僥疑。

 

        文化大革命結束了,中國ê人喘一個大氣。續落去改革開放chit三十年,散(sàn)久散了驚ê中國人,逐個緊掠鄧小平hit句「無管烏貓白貓,會掠鳥鼠ê就是好貓」作聖旨,「向錢看」!大官大歪、小官小歪、無作官無thangê用烏ê,啥物烏心產品都敢做都敢賣。

        溫家寶總理講:「我猶原beh強調tio̍h愛講真話。」上假ê tio̍h是伊chit句話!中國到chit是猶有真少數敢真話ê人,問題是嘴若開就hông掠去入監坐牢。台灣俗語話講:「大狗peh牆,細狗學樣。」中國政府chhoā頭講白賊:明明是為錢服務,講是為人民服務;人民完全無選擇家己ê政府,講是人民政府;文化大革命明明是毛澤東舞ê,罪攏推͘四人幫;明明是錢上大ê資本主義社會,講是具有中國特色ê社會主義社會。人民學政府講白賊,behsiáng

        中國頭人談論道德,驚笑破人ê嘴?

 

        註:「向錢看」 請用華語唸

 
< Prev   Next >