首頁 arrow 綠色短評 arrow 馬腳趖來ah!

馬腳趖來ah! PDF 列印 E-mail
2008/01/24, Thursday

        Chit遍立法委員選舉,中國國民黨大贏了後,講in be7濫sam2用權力。都過無三工,馬腳就so5出來,koh一遍hou7咱知影,中國國民黨講e5話實在是be7聽得。你看,中國國民黨總統候選人馬英九e5律師宋耀明ti7一月十五指控講,因為特偵組檢察官侯寛仁、沈明倫及周士榆三位檢察官有政治動機、情感偏頗情形,用chit號彎彎曲曲e5理由,向最高檢察署聲請這三個檢察官tioh8廻避偵辦三中案等案件。

       Ti7「法院是咱開e5」hit個時代,中國國民黨欲按怎舞就按怎舞,無人有伊法。會記得一九五七年,台中地檢處檢察官黃向堅ka7中國國民黨籍南投縣長李國楨以貪瀆罪起訴,一審無罪,檢察官不服欲再上訴,竟然遭受tioh8首席檢察官施壓,ti7公文頂面批示:「奉命不上訴」,笑死五百外人。當時省議會及立法院攏有人質詢:「首席檢察官講奉命不上訴,到底是奉啥人e5命咧?」答案講是「奉家己e5命。」koh再笑死五百外人。

        馬英九想講立法委員選舉大贏,chit聲好勢ah,想tioh8總統大選穩贏ah,那像koh倒退轉去三四十冬前一黨獨裁e5時代,啥物代誌ma7敢做!馬英九要求三位檢察官迴避,明明是欲逼檢察總長陳聰明ti7公文頂面批示:「奉命tioh8迴避!」好佳哉檢察總長陳聰明人及伊e5名仝款,伊強調講:刑事訴訟法有法定迴避構成要件。Be7使因為馬英九是總統參選人,就來影響辦案e5檢察官tioh8迴避抑免。伊已經指示三位檢察官提出書面報告,近期內會有結果。

  代誌真清楚,刑事訴訟法第十七條規定,推事本人若是被害者、抑是及被告抑是被害者有婚姻關係抑是親成關係,以前抑是現在是被告、被害者抑是自訴人e5代理人、辯護人、輔佐人等等,tioh8家己迴避,推事若家己無迴避,當事人會使聲請推事迴避。Chia所講e5推事,是法官、檢察官及書記官ma7適用。咱看chia e5「法定迴避構成要件」,馬英九無一點會合。雖然聲請迴避是被告e5權利,不過一個讀法律、得tioh8哈佛大學法學博士學位、曾做過法務部長e5馬英九那會做chit款「橫柴夯入灶」e5聲請咧?

        古早中國大官出巡,行頭前e5左右tioh8夯「迴避」e5牌仔,警示過路人tioh8迴避。歸頭殼中國封建思想e5馬英九,叫伊e5律師夯「迴避」e5牌仔,用m7成理由e5理由,叫欲查伊e5案e5檢察官tioh8「迴避」。講「迴避」,咱一般小百姓有可能聽無,這兩字e5意思就是講「閃khah開咧!」

  馬英九猶未當選總統都 chiah呢sang2勢,若hou7伊做總統猶會直!
最後更新 ( 2008/01/24, Thursday )
 
< 前一個   下一個 >