首頁 arrow 綠色短評 arrow 溫柔koh 堅強ê蘇治芬!

溫柔koh 堅強ê蘇治芬! PDF 列印 E-mail
發表者 李南衡   
2011/05/06, Friday
        越南戰爭尾期ê 1973年二月,一位日本攝影記者今井今朝春佇砲火中飛去越南戰地,伊kah別人無仝ê是,伊專工去採訪戰爭中ê囡仔,m̄-nātio̍h真濟戰爭中囡仔無辜ê眼神,收集了少囡仔寫ê詩、日記、批信,伊用內底一張批「寫͘戰爭阿叔」the̍h來作冊名,佇日本出版。內底當然有一寡伊到各所在採訪囡仔生活ê紀錄,有一工伊去參觀一間破sàm ê孤兒院,伊猶原有準備一寡細項物件像鉛筆、thit-thô物、尪仔冊behin,伊佇一個囡仔面前,問伊愛啥物,囡仔搖頭講啥都無愛,干單愛伊抱一下。抱一下?是按怎那會愛人抱一下咧?聽通譯解釋才知影,伊自了m̄-bat hông抱過。雖然hit-ê囡仔身軀無真清氣koh有臭牛奶hiàn,作者講伊m̄-bat攬過一個囡仔攬kah hiahtiâu

 

        鏡頭徙轉來咱台灣,雲林縣長蘇治芬chit-ê「阿芬師」,五月初三佇雲林縣溪洲國小作「一日媽媽」,親身煮菜請一陣單親家庭ê學生囡仔食飯,提早過母親節。學生囡仔bat禮數,有奉茶請縣長飲ê、有獻花獻卡片͘縣長媽媽ê。有一位學生囡仔送家己做ê母親節卡片͘縣長了後,縣長攬tiau-tiâu、哭kah bē出聲;有一位查某囡仔攬tio̍h縣長講:我無媽媽。蘇縣長真甘、kah囡仔哭參落,安慰囡仔tio̍h愛堅強勇敢。

        蘇治芬縣長佇無媽媽ê囡仔面前,會chiah呢溫柔,因為蘇縣長充滿愛心,疼惜縣民親像家己ê子女,真正會堪得叫作「父母官」;因為蘇治芬bat經驗過欠人疼惜ê查某囡仔。伊九歲ê時,老父蘇東啟就因為叛亂罪͘中國國民黨政府掠去判死刑、佇國際壓力下改判無期,老蔣死了特赦放出來,獨房關伊十三冬。用「知情不報」罪名對付蘇治芬ê老母蘇洪月嬌,mā kā關兩年、連幼嬰仔做夥掠入去關。蘇治芬有十三年久生活佇單親家庭,其中有兩年是父母攏佇籠仔內、比單親家庭koh khah悲慘ê「無親家庭」孤兒。

        2008年十一月初四透早,雲林地檢署去縣長官邸搜索,蘇治芬縣長掠去,法院裁定收押兩個月,講伊涉工程弊案。另一面兵分十二路去搜索縣政府、環保局等十二個地點,掠環保局長等幾個人。中國國民黨政府實在是目睭毛無漿ám,踢tio̍h ê 是普通鐵枋,是千錘百煉出來、堅強無比ê鋼坊蘇治芬!

        法院原本裁定六百萬交保,蘇治芬講我無錢、我無罪,beh交啥保!伊hông掠入去關就絕食抗議非法拘押,絕食超過二百五十點鐘。檢方求刑十五年了,雲林地方法院裁定免交保、當庭放人。今年四月二九一審判蘇治芬無罪。

 

        佇無媽媽ê囡仔面前hiah呢溫柔ê蘇治芬縣長,原來是chiah呢堅強!

 
< 前一個   下一個 >