首頁 arrow 綠色短評 arrow 民主自由就是會使公投會使獨立!

民主自由就是會使公投會使獨立! PDF 列印 E-mail
發表者 李南衡   
2011/05/13, Friday

        五月初六,蘇格蘭民族黨選舉大嬴,the̍h tio̍h蘇格蘭議會多數席位,chit-ê黨頭一遍控制蘇格蘭議會,原本聯合執政ê自由民主黨大輸。Chit件代誌特別引起人注目,是因為chit-ê黨一直以爭取蘇格蘭獨立作訴求,黨主席Salmond表示伊會五年內推捒蘇格蘭舉行獨立公投。英國政府ê蘇格蘭事務大臣Moore講:英國政府阻擋蘇格蘭ê獨立公投,mā bē對蘇格蘭舉行獨立公投是是正確提出憲法質疑。伊本人是蘇格蘭人,伊講:獨立公投ê時伊會去投反對票。

 

        Che hō͘咱會tàng深思幾項代誌:

        英國ùi無流血ê 「光榮革命」到今已經三百外年ah,雖然一路行來kham-kham khia̍t-khia̍t,總是民主政治佇英國已經誠成熟,無可能做出反民主、反自由ê戇代誌。所以英國政府無大細聲講:蘇格蘭是英國不可分割、神聖領土ê一部分;無裝千幾粒飛彈向蘇格蘭;koh khah無訂一個啥物反國家分裂法來威脅蘇格蘭。蘇格蘭王國自從1707kah英格蘭王國合做夥,成作「大不列顚王國」了後到今,一直有一陣人tehbeh獨立,in形成一個政黨就是chit-ê蘇格蘭民族黨。

        1998年,英國政府根據1997年通過ê公民投票決議,公布了蘇格蘭法案,確定hō͘消失beh三百年ê蘇格蘭議會koh恢復,掌握大部分ê地方自治權。十幾年來執政ê自由民主黨第一遍落台,有影是無永遠ê執政黨。

        頭一遍嬴tio̍h選舉會tàng執政ê蘇格蘭民族黨,是真有撙節,in知影是全部人民攏支持in,支持in ê mā m̄是完全贊成in所有ê政見,逐個攏知in上拍拚推捒ê就是獨立,但是in猶原講執政ê五年內beh拚獨立公投。雖然公投佇民主自由ê國家是真平常真正常ê人民行使政權ê方法之一,總是in mā真慎重,為tio̍h beh教育人民,hō͘人民真正瞭解獨立ê意義才來舉行公投。大多數ê人民若真正beh愛獨立,有啥人會tàng阻擋?若是獨立公投無過,天mā bē崩落來;佇完全無外力威脅恐嚇下面,人民自由意志所做ê決定上大,bē tàng怪東怪西,會tàng怪ê干單一項:家己努力無夠。Koh khah拚勢一下,後遍猶有機會。

        Ùi 1990年到今,全世界舉行公投成功變作獨立國家ê至少有二十個,獨立公投失敗ê有六、七個所在。最近幾年內可能舉行獨立公投ê有成十個所在。咱替chia-ê獨立公投有過ê、無過ê、kah最近有可能舉行獨立公投ê人歡喜,因為世界上猶有真濟所在ê人無可能公投,甚至有真濟所在ê人干單主張獨立,人就pàng見、有可能就hông砰掉,連身屍都無底chhoē!因為佇自由民主ê所在才會tàng公投,生活佇自由民主所在ê人才會tàng大聲講beh獨立!

 
< 前一個   下一個 >