首頁 arrow 綠色短評 arrow 中華民國敢m̄是殖民政權?

中華民國敢m̄是殖民政權? PDF Print E-mail
Written by 李南衡   
Friday, 03 June 2011
        五月二四,作家黃春明佇台南台灣文學館演講:「台語文書寫kah教育ê商榷」,成大台文系副教授蔣為文佇台腳夯大字牌抗議,用台文kah華文寫講:「Tâi-oân chok-ka ài iōng Tâi-oân-gí chhòng-chok !」、「台灣作家不用台灣語文,卻用中國語創作,可恥!」、「用殖民者的語言華語創作才須商榷!」引起黃春明褪外衫講垃圾話,拚落來台腳beh chhoē蔣為文算數。政大台灣文學史研究所長陳芳明講:蔣為文ê講法m̄-nā「時空錯亂」,koh khah e̍h化台灣文化、傷害其他族群感情。伊koh講:戒嚴時期早期,部分人士確實bat用殖民政府來指稱1949年來台灣ê國民黨政府。hitê政治氣氛、社會環境kah chit-má完全無仝。Ta台灣已經是民主開放社會,人攏會tàng自由選擇所追求ê價值,chitkoh講殖民關係,會使講是tehhàm古。

 

        敢按呢?

 

        1895年六月十七,日本政府正式宣布統治台灣,以大日本帝國憲法作統治台灣ê最高法;講台灣人是大日本帝國國民,無願意作大日本帝國國民ê人,會使tī 1897年五月初八進前離開台灣;講「君之代」(kimigayo)是國歌、「日之丸」(hinomaru)是國旗;派樺山資紀來作台灣總督。攏無得tio̍h台灣人ê同意。

        1945年十月二五,中華民國政府正式宣布統治台灣,原本beh講以中華民國憲法作為統治台灣ê最高法,失禮,hit陣猶無中華民國憲法,知台灣hit陣是是無法無天ê時代?講台灣人是中華民國國民;講「三民主義吾黨所宗」是國歌、「青天白日滿地紅」是國旗;派陳儀來作台灣省行政長官。攏無得tio̍h台灣人ê同意。

        1895年六月十八,台灣總督府學務部長伊澤修二提出如何͘新領地人民趕緊學日本語,將統治者語言作「國語」(kokugo)、作學校ê教學語言,不准台灣Holo、客家、原住民各族人民使用in家己ê母語。無得tio̍h台灣人ê同意。

        1945年三月,中華民國政府就擬訂了〈台灣接管計劃綱要〉關於語文第一項建議:國語普及kah計劃,ùi中小學、公務員開始。統治者ê語言叫作「國語」(ㄍㄨㄛˇ ㄩˇ)、作學校ê教學語言,不准台灣Holo、客家、原住民各族人民使用in家己ê母語。無得tio̍h台灣人ê同意。

        逐個攏知,日本殖民統治台灣,日本政府是殖民政府,台灣是殖民地。

 

        按呢你講,中華民國敢是殖民統治台灣?中華民國政府敢是殖民政權?台灣敢是殖民地?華語敢是殖民統治者ê語言?

 
< Prev   Next >