首頁 arrow 綠色短評 arrow 台灣主權kah地位,美國講ê才準算!

台灣主權kah地位,美國講ê才準算! PDF 列印 E-mail
發表者 李南衡   
2011/06/10, Friday
        2007年七月二七,聯合國秘書長潘基文講:目前聯合國ê立場是「中華人民共和國作為中國ê唯一合法政府代表整個中國,台灣是中國ê一部分」。美國政府聽了驚一跳。八月三十一,美國在台協會理事主席卜睿哲講:「自1950年以來美國所主張ê台灣地位未定,是指台灣chit塊土地ê主權未定。」九月初五,美國國務院回覆聯合國秘書長潘基文ê話講:「台灣是中華人民共和國ê一部分。」

 

        2008年八月,馬政府上台了後,美國Bush總統以國務卿Rice名義向海外各大使館發布關於「ROC存在問題」,有:「ROC並無領有台灣」、「一般ê名稱是台灣,bē tàng使用ROC」等內容。八月,馬英九經由美國西部去訪問巴拉圭ê時,美國政府特別派前任AIT代表包道格kah伊見面,要求馬英九嚴守「兩個bē-tàng」原則,無論啥物場合都bē tàng講中國擁有台灣ê主權,甚至連暗示mā bē-tàng;關於台灣ê任何國際活動,北京絕對bē-tàng無有最後ê決定權。

        三月二五出版ê「玉山周報」報導:日本大地動了後,三月十七美國國務院宣布撤離駐日人員、美軍kah家眷,beh坐包機去南韓kah台灣。三月十八半暝,第一批ùi日本撤僑來台灣有九十六個大人kah囡仔,美國政府照例干單佇台灣ê中華民國政府「知會」一下。攏總有偌濟人來?知,不過知影in有訂五星級飯店九百間房間,應該有三千六百外人,che1979年斷交以來美籍人員來台灣人數上濟ê一遍。In落飛機了後tio̍h全部由AIT派出ê美籍人員處理,中華民國桃園機場所屬ê入境海關官員kah移民署,攏bē-tàng插手,而且AIT自三月十八開始全部暫停簽證kah所有業務。行政院長吳敦義接受媒體訪問ê時指出,伊希望AITtàng hō͘中華民國移民署幫助AIT佇機場ê通關手續。伊無向AIT接洽,對記者講啥?Che明明是無主權國家ê最高行政主管teh狗吠火車。

        另外一個狗吠火車ê例,是中國人民解放軍總參謀長陳炳德,五月十八佇美國國防大學演講ê時講:台灣是中國ê領土,為啥物需要美國賣武器裝備hō͘台灣?美國若繼續軍售台灣,一定會影響中美關係。伊批評講:美國ê台灣關係法就是干涉中國內政,美國有少國會議員同意,台灣關係法應該tio̍h重新審視。奇怪,台灣關係法並是今年才訂ê美國國內法,中國政府三十幾年來是按怎m̄-bat正式抗議?因為中國若大聲,驚美國會the̍h台灣地位未定論來拄!

        按呢你就知影,是按怎今年世界衛生組織文件台灣列作中國ê一省,美國衛生部長五月十七明確表示:聯合國無任何一個機構有權片面決定台灣地位。那會按呢講?因為台灣主權kah地位,美國講ê才準算!

 
< 前一個   下一個 >