首頁 arrow 綠色短評 arrow 害家己死ê方濱興!

害家己死ê方濱興! PDF 列印 E-mail
發表者 李南衡   
2011/06/17, Friday
        方濱興是siáng?十個台灣人有可能九個九m̄-bat伊。但是佇中國,智識分子逐個都bat伊,是伊ê名聲透京城,是伊ê臭名透全中國,講tio̍h伊ê名,有可能大部分ê中國智識分子都會咬牙切齒、氣kah bē講話。因為伊是「防火長城」抑是講「中國大防火牆」ê設計者,「防火長城」英文叫作Great Fire Wall,簡稱“GFW”,方濱興hông稱呼作「GFW之父」。若kah萬里長城比並,兩個ê差別是:古早萬里長城是為tio̍h beh防止外國武力入侵中國,當今防火長城是為tio̍h beh防止中國人佇網路頂面偷走出去外國電子資訊世界loā-loā-sô、烏白看。

 

        防火長城是中華人民共和國政府佇伊管轄ê網際網路內部,所建立真濟套網路審查系統ê一種。Ùi 1998年開始起造,英文名是ùi 2002年五月十七Charles Smith所寫ê一篇有關中國網路審查ê文章「中國防火長城」來ê。中國政府為tio̍h beh監控kah過瀘網際網路內容ê tēngkah軟體系統,凡若無符合中國官方要求ê任何傳輸內容,伊tio̍h kā進行干擾、阻擋、斷掉、抑是遮閘起來。但是國內若出現無合中國官方要求ê傳輸內容,網站會受tio̍h政府直接ê行政干預,要求in自我審查、自我監管,若koh無聽話,政府就伊關掉。所以咱知,防火長城是完全針對中國境外網路ê資訊。趣味ê是全中國智識分子攏知影chit-ê若像監獄牆圍ê防火長城,但是中國政府自了m̄-bat正式承認有chit-ê防火長城,tèⁿ戇那像完全知有chit項代誌。

        方濱興是北京郵電大學校長、是中國工程院院士、防火長城關鍵部分上主要ê設計師。五月十九下晡,方濱興校長去訪問武漢大學ê時,現場有人向方校長khian雞卵khiantio̍hkoh kā khian鞋仔,第一腳khian著、第二腳khiantio̍h,現場發生衝突,有十幾個人jiok出來beh掠人,hō͘學生擋tio̍h、抗議者順利走離現場。雖然chit-ê消息隨時佇網路頂面hông刪除,不過消息已經傳遍全中國,有人佇網路頂面滾笑,講beh發起啥物「用鞋仔khian方校長解救中國網際網路」ê活動。中國政府氣起來中國網路頂面ê方濱興攏消毒掉,也就是講你若拍「方濱興」chit三字關鍵詞,結果是「根據相關法律kah政策,部分結果顯示出來。」方校長眠夢到伊ê大名佇網路頂面竟然hō͘家己設計ê系統刣死。

        《史記.商君列傳》講tio̍h商君(也就是商鞅)走路到關下,想beh住客棧,店主人知伊就是商君,講:「商君有訂一個法,住客棧ê人客若無身分證件,客棧tio̍h受處罰食罪。」商君怨歎講:可憐啊!家己訂ê法竟然會tàng kā家己害kah chiah悽慘!知方濱興chit陣有按呢怨歎抑無?

 
< 前一個   下一個 >