首頁 arrow 綠色短評 arrow 阿扁阿輝是中國心目中兩個戰犯!

阿扁阿輝是中國心目中兩個戰犯! PDF 列印 E-mail
發表者 李南衡   
2011/07/01, Friday
        六月三十,特偵組起訴李前總統kah劉泰英,講查國安密帳案認定in涉嫌侵占美金7797 千外(約新台幣兩億五),引用「侵占公有財物罪」條例,會tàng判十年以上有期徒刑到無期徒刑。李前總統第一時間講是驚一跳。

 

        咱應該ùi源頭講起。蔣家父子作中華民國總統幾十年beh按怎用錢tio̍h按怎用,事實上,除了in父子以外也無別人作過總統,其中雖然有一位嚴家淦,相信伊mā m̄tio̍h按怎用才違法,講khah實在那有人bat想過違法ê問題。李登輝接任蔣經國ê黨國體制,當然是照以前總統用錢ê方式,也就是講「有樣看樣,無樣家己想。」續落來ê陳水扁是照慣例去用錢。

        2006年媒體報導總統有濫用國務機要費ê可能,十一月初三,台灣高等法院宣佈國務機要費案偵察終結,起訴四人,阿扁總統本人等伊卸任了才beh起訴。民進黨民意代表,認為仝款道理,台北市長馬英九ê特別費支出過程有問題。特別費持有人有支配權並是有所有權。馬英九有將特別費一半存入伊個人銀行口座而且私用,涉嫌貪污kah偽造文書罪。法官蔡守訓引用「宋朝公使錢」會使作私人之用判馬英九無罪,市長室秘書長余文食罪判兩年四個月。立委蔡啟芳提出疑問,全中華民國的政府首長特別費,包括檢察機構ê檢察長在內攏有問題。拖到今年(2011)五月初三,立法院才三讀通過《會計法》修正案,確認2006年十二月三十一以前,各機關支用ê特別費所有財務責任攏拍拄銷,無任何行政、刑事、民事責任。包括中國國民黨、民進黨歷任副總統、行政院長、各部會首長、各縣市長等等攏總有七千五百位首長ê特別費「除罪化」。

 

        仝款性質ê總統國務機要費那會無算在內?當然使算!若算落去,阿扁前總統kah阿珍總統夫人攏無罪nehchit點,馬英九kah中國國民黨絕對無讓步!馬英九就任總統頭一件政績,就是阿扁前總統掠起來關,上大ê罪名是濫用國務機要費。阿扁前總統若無關,beh按怎向中國交待咧!因為阿扁前總統大細聲喝講「台灣、中國,一旁一國」!

        馬英九chit任總統落台進前,一定tio̍h起訴阿輝伯前總統。因為伊大細聲喝講台灣kah中國是「特殊國kahê關係」所謂ê「兩國論」。馬英九若koh hō͘伊當選總統,一定會阿輝前總統判重刑掠去關。按呢咱tio̍h知,是按怎國務機要費使照首長特別費講是「歷史共業」伊「除罪化」!國務機要費若是「除罪化」,阿扁阿輝兩位前總統攏無法度辦落去ah,按呢那會使?因為馬英九足清楚:阿扁阿輝是中國心目中兩個戰犯!

 

 
< 前一個   下一個 >