首頁 arrow 綠色短評 arrow 起訴阿輝伯ê時間有問題無?

起訴阿輝伯ê時間有問題無? PDF Print E-mail
Written by 李南衡   
Friday, 08 July 2011
        六月三十,特偵組起訴李前總統,檢察總長黃世銘七月初二講:選舉期間絕對是違法政治人物ê保護傘,國安密帳案都已經拖八年(意思是講hō͘阿扁前總統壓八年無辦),敢講tio̍h親像江國慶案拖過追訴期限消滅嗎?對外界質疑是按怎tī 2012年總統大選前七個月才辦?黃世銘反駁講:若是選前七個月bē tàng起訴,選前八個月抑是九個月會使起訴嗎?台灣每年都有選舉,按呢是是攏使起訴?

 

        好,咱來請教黃世銘檢察總長。

        新聞攏講2000年,台灣第一遍政黨輪替了後,國安局上校劉冠軍公家ê錢款lè soan去中國,所謂ê「國安密帳案」才爆露出來。Koh講是阿扁前總統kā chit-ê案壓八年無辦,聽起來那像真可惡!黃世銘檢察總長講:若是檢方無「掀起來辦」,就是tèⁿ作臭耳人、假作啞口。馬英九總統已經作三年ah,是按怎一千外工攏無beh辦?那會chit-ê時間耳仔忽然間有聽tio̍h koh也會講話ah?若是講馬英九總統是管外交kah國防無插司法,阿扁前總統敢是按呢?是是講阿扁前總統時代有司法人員掩蓋chit-ê案拖八年無辦、無罪,所以講馬英九總統時代有司法人員掩蓋chit-ê案三年無辦,是無罪。敢講唯一有罪ê是阿扁前總統?

        舊年五都選前之夜ê十一月二六,佇新北市議員候選人陳鴻源競選造勢晚會台頂,中國國民黨中央委員連勝文面部hō͘人彈銃。案情猶亂糟糟ê十二月初一早起十點,聽講kah兇手「馬面」有熟似ê陳鴻源競選總幹事杜義凱忽然間坐飛機去中國,講去中國是「beh the̍h牛奶粉錢去hō͘人」。連警方檢方都認為動機可疑、擔心伊ê生命安全。伊第二工十二月初二,平平安安轉來台灣。你講伊去中國創啥、有啥證據?無啊!無人有任何證據,總是bē tàng禁止人感覺怪怪,心肝底起疑、問講:那會按呢?仝款道理,六月初八檢察總長黃世銘去北京,十五轉來,三十李前總統起訴。台聯黨主席黃昆輝講黃世銘是奉中國之命起訴李前總統,無啥證據?無啊!總是bē tàng禁止人感覺怪怪,心肝底起疑、問講:那會按呢?黃世銘七月初一親身出面說明講,伊六月初八去中國進行司法互助交流,攏是團進團出,並無單獨關房間門密談,伊講「天腳下猶有瞞會tiâu ê秘密嗎?」伊認為相關ê講法純然是憑空想像,攏是無根據ê。事實上若真正beh講啥交代啥,無需要房間門關起來密談,一分鐘tio̍h有夠!che是一般ê常識,kah啥物根據攏無關係。

        起訴阿輝伯ê時間,有人講有問題,有人講無問題。Che才是問題!

 
< Prev   Next >