首頁 arrow 綠色短評 arrow 台灣,敢講是別人ê專利?

台灣,敢講是別人ê專利? PDF 列印 E-mail
發表者 李南衡   
2011/07/15, Friday
        三十年以前,若是講台灣按怎按怎,會hông警告講:khah細膩一下,會hông點油作記號,懷疑你是台獨份子、「共匪的同路人」(chit句話一定tio̍h用華語講)。Hit陣驚驚,會問講:無,beh按怎講?人會教你講:一定tio̍h愛講中華民國,若是講台灣就是無愛國!

 

        十外年前才知影,全世界差不多無人叫咱中華民國。M̄-nā共匪、歐洲各大國,連上親密ê戰友日本、美國,稱呼咱是台灣。咱參加世界各種組織抑是各種國際性運動,攏bē tàng使用「中華民國」chit-ê名。是按怎bē tàng?講因為咱是聯合國會員國,無人承認chit-ê是國名。既然按呢,倒轉來用咱原本ê名-台灣,敢會tàng?包括中國在內,國際上真濟國家攏講:be-tàng!真奇怪,中國恁叫阮啥物名?台灣。美國恁叫阮啥物名?台灣。日本咧?台灣。全世界所有ê國家攏叫阮台灣,阮是按怎be-tàng叫阮家己ê名是台灣咧?無,按呢阮叫作啥物名?別人應講:中華台北。實在有夠橫逆!he是啥物碗糕名?

        Koh-khah可惡ê是佇咱台灣國內,有人家己講是「新台灣人」、「燒作灰是台灣人」in hit黨ê,卻不准咱叫家己ê名台灣、講家己是台灣人!前無諾久,民進黨提名總統候選人蔡英文,佇英國拍一支競選廣告影片,內底伊有講一句:「我是蔡英文,我是台灣人。」按呢ah!名家、名嘴連續罵蔡英文三、四工,罵伊「操弄族群」「拆裂族群」!會使講台灣差不多所有中國派ê報紙雜誌電視電台各種媒體總攻擊。那像效果無啥理想,講khah正確應該講得tio̍h反效果,台灣人問講:阮當然是台灣人,若是台灣人,無你是啥物人?

        「燒作灰是台灣人」hit-ê馬英九忽然間會講話ah,佇「面冊」(face book)頂面寫「Siáng是啥物人」:「血統上,我是中華民族炎黃子孫,熱愛中華文化;身分上,我認同台灣,為台灣拍拚,是台灣人;國籍上,我是中華民國國民,是中華民國總統。」真可憐,講伊是「台灣人」,tio̍h九彎十八斡才講會出來!

        想起幾年前,中國佇國際網路頂面,台灣啥物啥物攏總註冊,台灣若有人beh註冊台灣啥物啥物攏碰壁,因為已經有人註冊了ahbē-tàng重複。現此時ê台灣,那像已經變作別人ê專利,全世界ê人攏會tàng使用,干單咱台灣人bē-tàng得,咱若使用「台灣」會變作「侵權」。佇國際上,因為中國硬作對,有可能行出去。信佇台灣國內,台灣,已經變作別人ê專利。

        好膽馬英九in繼續台灣當作專利,只准in家己使用,不准台灣人使用。好膽繼續拚勢攻擊蔡英文講伊家己是台灣人。拜託!

 
< 前一個   下一個 >