首頁 arrow 綠色短評 arrow 王建煊捧屎抹面

王建煊捧屎抹面 PDF 列印 E-mail
發表者 李南衡   
2011/07/22, Friday
        七月二十,法務部廉政署正式掛牌成立,王建煊致辭十二分鐘,伊講:司法是人民最後一個防線,最近看tio̍h法官貪污,假使法官是有錢判生、無錢判死,人民會向天怨歎:「天啊!公理何在?」che對社會影響非常大,逐個會大tio̍h驚,按呢落去,台灣beh按怎?王建煊抨擊無偌久前公立病院院長涉貪,伊講,醫生是濟世救人ê,薪水真懸,屬社會中上以上ê水準,那會做傷天害理ê代誌咧?海關koh khah是結構性ê貪污,人數濟、時間長,收錢那像收規費一款,老百姓攏知影,beh那有法度擋人批評議論咧?海關、法院、病院內底ê政風單位,財政部、衛生署攏teh創啥?攏teh睏、激一個姿勢niā-niā嗎?chit中間絕對有一大堆問題,若是講攏有舉報,按呢咱beh問檢察官teh創啥?

 

        王建煊講廉政署成立,人民、媒體攏支持,無hit成功ê道理,將來若無績效,廉政署成員攏tio̍h負責,雖然bē-tàng像日本按呢切腹自殺,但是應該愛有chitê氣慨,bē-tàng推責任。但是伊希望廉政署半年內先內部ê雜牌軍整頓好勢,統一肅貪意志。

        王建煊講,廉政署雖然是排佇法務部下面,只要法務部長、行政院長、總統副總統攏mài干擾,猶原會tàng獨立辦案,若無就是排佇總統府下面,是仝款會有總統干擾。伊講,立法院有可能是干擾辦案ê重要來源,因為立法院有民意壓力,會關說、暗示等,希望立委mài去干擾。

 

        你若知王建煊是啥物人,有可能會阿老王建煊講了有夠讚。但是,你若知影王建煊是當今現任監察院長,你一定會罵講:世間那有chiah見笑ê人?監察院是中華民國最高監察機關,對貪贓枉法ê政府官員有彈劾權,對重大政策有做m̄-tio̍h、有失覺察 ê政府官員有糾舉權,對烏白開錢、無正確使用預算ê政府官員有審計權,對總統副總統、各院長部長一直到綠豆烏麻大ê全國官員,m̄-nā是有權、是有責任監察。王建煊對新開張ê廉政署所講ê每一句話,若「廉政署」三字改作「監察院」攏會通。伊對海關、法院、病院kah in ê主管單位財政部、法務部、司法院、衛生署罵kah無一塊好,是按怎監察院攏無作為放͘爛、是按怎無利用chit-ê機會向全國人民會失禮,照伊對廉政署所講ê bē-tàng像日本人切腹自殺,至少愛有hit種氣慨,宣布自今仔日開始,伊辭掉院長、監察院關門,所有做無好勢ê工課,由廉政署來接手。按呢,咱phok-á

        王建煊監察院長三年外做kah離離落落,曉檢討家己都真慘ah,那有面佇hia大細聲、公開落氣͘人看?明明是捧屎抹面!

 
< 前一個   下一個 >