首頁 arrow 綠色短評 arrow 有人m̄知啥物是國格!

有人m̄知啥物是國格! PDF 列印 E-mail
發表者 李南衡   
2011/07/29, Friday
        七月二三,ùi菲律賓首都馬尼拉(Manila)飛往第二大都市宿霧(Cebu)ê飛機頂,有十二名受菲律賓觀光部邀請ê中國記者,m̄-nā歸陣嘻嘩叫大細聲,而且koh有人the̍h翕相機佇機頂行來行去、無人同意四界kâng翕相。菲律賓總統阿基諾(Aquino III)ê姐夫Khurusu(Eldon Cruz)拄好坐佇仝班飛機,伊請in講話khah細聲一絲仔、拜託mài kā翕相機the̍h-lè佇飛機頂四界行四界翕相,驚翕相機會去弄tio̍h其他ê旅客。無疑誤有兩個中國記者m̄-nā無聽勸解,煞見笑轉受氣,一個chang-tio̍h Khurusu先生ê衫仔領beh kā拍,另外一個kā tē頷頸。好佳哉機員趕到kā in giú開。Khurusu先生講:任何菲律賓人都無應該受任何外國人侮辱,但是伊個人並無beh提出告訴。飛機到宿霧了後,chit十二個人全部͘警方掠去。經過中國領事館人員出面協調,其中十個人釋放、繼續in佇宿霧ê行程。中國領事館講歸個事件是一場誤會,雙方問題已經解決了ah!事實上是起腳動手hit兩個先hông扣押起來,等第二工下晡坐飛機轉去北京,菲律賓政府kā in兩個人列作「無受歡迎ê人」,永遠bē-tàng入境菲律賓。Che就是菲律賓ê國格。

 

        咱知,西方國家真濟大教堂抑是大建築物頭前攏有廣場,真濟粉鳥會佇廣場低低飛來飛去、甚至佇土腳散步,真大扮、攏無驚人。六七年前,佇英國新堡(New Castle) ê一個廣場有一個中國留學生,伊佇廣場追jiok粉鳥,若͘ jiok tio̍h伊就用腳踢,若像愈踢愈歡喜愈趣味。時間應該是不止久,久到有人去報警、警察趕來伊猶teh jiokteh踢粉鳥。警察chhoā伊去警察局做筆錄了後,用hit-ê中國留學生ê錢買特等艙ê機票,第二工伊軀逐出境、趕轉去中國,伊講伊是「無受歡迎ê人」,永遠bē-tàng入境英國。因為:無疼惜小動物ê人無適合佇英國生活。Che就是英國ê國格。

        2011高雄bì-lù節」七月二二佇「夢時代廣場」起鼓,頭一工暗時十一點hit工ê活動結束了後,有一個來台灣自由行ê中國人有可能飲kah茫茫,佇hia大細聲抗議活動傷早結束,受氣起來竟然起腳踢工作人員、夯椅仔beh拍人,大細聲招人kah伊「孤對削」!等警察趕到位,koh大聲講伊是ùi北京來ê!甚至用中國ê圾垃話chhoh警察!警察按怎好話相勸攏無效,而且愈鬧愈亂,完全失去控制。最後警察夯銃出來阻止,兩三個警察才伊押tiâu、掠轉去警察局做筆錄。͘伊踢kah東倒西歪hit-ê工作人員講:來者客。無beh提出告訴。事後無任政府機關做啥物動作、無任何大人出來講半句話。

        Che敢就是台灣ê國格?咱khah煩惱ê是:有人知啥物是國格!

 

 
< 前一個   下一個 >