首頁 arrow 綠色短評 arrow 政府teh割台灣農民ê血筋!

政府teh割台灣農民ê血筋! PDF 列印 E-mail
發表者 李南衡   
2011/08/12, Friday
        台灣山懸溪河短,雖然雨量少,總是落雨kòng-kòngê溪水大部份攏流入海。台灣大部份土地攏焦燥無好種作,台灣人用智慧解決先天缺陷,開「圳溝」來收山坑仔水kah引大溪河ê水來灌溉田園;開「埤」來貯蓄雨水、有時有調節圳溝水ê功能。清道光18(1838)引下淡水溪(高屏溪)水開闢「曹公圳」,成作高雄上大圳溝ê鳯山知縣曹謹,͘高雄農民感激beh兩百年;日本昭和5(1930)完成ê嘉南大圳,千里水路造就萬頃良田,͘嘉南平原增加三十倍水田,四年後稻仔收穫量增加四倍ê日本人八田與一,͘台灣人數念beh成百年。除了chit兩個大圳以外,其他台灣ê圳溝大部分是民間所建造ê,像清康熙48(1719)建成ê「八堡圳」是施世榜個人籌款所建ê,幾遍失敗了後,一位自稱姓林ê人用「倒筍」ê壩籠才濁水溪水順利引入大圳,大圳建成了已經chhoē無伊ah!二水一間「林先生廟」就是紀念伊,感謝伊͘彰化一半ê地區(hit當時八個堡)有水thang作田。彰化另外一條是「莿仔埤圳」,先後ùi清國乾隆時代ê陳四芳,一直到後來ê葉惠清chhoā地方人士創建完成ê,主支分線攏總有三十九公里長,灌溉地區遍及溪州、埤頭、二林、芳苑、北斗、竹塘kah大城等彰化西南地區。

 

        戰後,台灣各所在ê農田水利會kah中國國民黨政府長期勾結,成作一個強koh有力ê共犯結構。部分不肖ê農田水利會水埤填作平地koh變更地目、成作住宅用地商業用地,莫怪真濟所在落一下雨就淹大水;有不肖ê農田水利會偷賣水,水利會變作自利會,完全記得「農田」。

 

        工廠需要水,政府犧牲就濁水溪沿岸ê農民,佇濁水溪源頭做一個「集集攔河

堰」,引一條水路直送雲林縣麥寮ê台塑六輕廠,每日供應二十五萬七千噸ê水,害濁水溪下游兩岸雲林縣kah彰化縣ê農民「灌四停六」,十工內底農民tio̍h過四工有水、六工無水ê日子,農民只好家己開井,用井水來補充。按呢,講使!講因為雲彰兩縣開井抽地下水,致使地層嚴重下陷,大大影響tio̍h高鐵運行ê安全。叫in tio̍h填井。農民問講:阮種作需要ê水咧?無人kā in應聲。

        雪上加霜,環評猶未過就動工ê中科四期,國科會委託農田水利會發包,ùi溪州「莿仔埤圳」接濁水溪ê源頭,埋設二十四公里長ê水管beh引水去中科四期。中科四期環評講:「中科管理局猶未chhoē tio̍h水源進前,每日會使調度六萬六千五百噸ê農業用水。」che敢是人講會出來ê話?八月初七,一萬八千公頃ê農民徛出來反對,佇溪州莿仔埤圳水源頭堤防邊,舉辦一場大型ê「護水行動」大會,阻擋beh斷莿仔埤圳ê水,喝聲͘逐個知影:政府teh割農民ê血筋!

        圳溝會使講是農民ê血筋!

 
< 前一個   下一個 >