首頁 arrow 綠色短評 arrow 逆風前進,行出台灣人e5真感情!

逆風前進,行出台灣人e5真感情! PDF Print E-mail
Monday, 10 March 2008

        一月十二立委選舉結果,民進黨ti7立法院e5 席次剩四分一,早前國民黨一黨獨大e5威權統治是m7是會koh轉來?台灣民主化猶未有成果,干單開花nia7-nia7就直直欲蔫去?hou7真濟台灣人傷心、喪志、失望,甚至真濟台灣人哀父叫母,問講:那按呢,咱三月總統大選是欲按怎選咧?立委選舉了後chit段時間,會使講是台灣民主上寒冷e5冬天。

        二月初六、咱人過年暗,十個少年家犧牲圍爐團圓e5溫暖,無管北風寒流e5侵襲,行!決定欲ui3台灣尾e5鵝鑾鼻行到台灣頭e5台北城。Chit個「逆風前進,最愛台灣」e5行路行動,就按呢恬恬行出來。一步一步行,一步一步行,路邊e5阿姆阿伯仔、阿兄阿姐及真濟少年人,排佇路邊及in手掌對手掌拍一下,表示親密感情,表達關懷溫暖,hou7 chit陣少年家koh khah有勇氣、koh khah有信心,台灣是充滿熱情e5所在。九十二歲e5烏腳病之父王金河醫師ti7路邊等候in,單純干單欲及chit陣少年家拍一下手掌來鼓勵in,逐個少年家攏擋be7 tiau5及依相攬一下,永遠會記得王老醫師吩咐e5話:「台灣咱e5母親,恁tioh8愛顧hou7好勢!」種出冠軍米e5「無米樂」紀錄片主角崑濱伯仔,用粗koh烏e5手及chit陣少年家手掌拍一下e5時,伊講,伊m7是藍色e5,ma7 m7是綠色e5,伊是土色e5!講出全台灣有良心e5台灣人e5真心話,阮及恁政治拼來拼去攏無關係,阮是屬於chit塊土地e5!
  當chit陣少年家及完全生份e5鄉親拍手掌e5時,無管是老e5抑是少年e5,無管是查晡抑是查某e5,in看tioh完全無熟似e5鄉親e5目箍內底,目屎ti7閃爍振動、有e5目屎滿面,煞hou7 in完全be7記得phong3 pha7 e5腳底。真濟鄉親及in做夥行,有e5行一公里,有e5行五公里,有e5及in做夥行到台北來。
  用二十二工、行五百十公里行到台北,及東部ui3台東開始行,仝款箭風向北e5社會人士及學者,二二八chit工,ti7台北會師,及十萬個鄉親做夥ti7台北市中山腳球場舉行晚會e5時,「逆風前進,最愛台灣」e5領隊鄭麗君講:阮按呢行,就是向台灣chit塊土地表達敬意,ma7欲向所有疼惜chit塊土地e5鄉親表示感謝。伊講,逆境hou7阮成長,愈行ma7 hou7阮愈謙卑。Koh khah確信tioh8疼惜土地上e5每一個生命,特別是弱勢者。阮按呢行,會當安慰二二八受難者在天之靈!伊講,人民徛出來,台灣就有希望!
  逆風前進chit陣少年家,上了不起e5所在是,ka7冷ki-ki台灣人e5心koh燒熱起來,因為in行出台灣人e5真感情。阮感謝恁!
 
< Prev   Next >