首頁 arrow 綠色短評 arrow 用李慶安ê話塞伊ê嘴!

用李慶安ê話塞伊ê嘴! PDF Print E-mail
Written by 李南衡   
Friday, 26 August 2011
        2008年三月,民進黨立委控告前中國國民黨立委李慶安有美國籍,擔任一屆台北市議員kah三屆立法委員期間隱瞞雙重國籍,詐領民意代表歸年費用kah薪水等有一億0兩百外萬。原本台北地方法院依四項詐欺罪判伊兩年有期徒刑。不服上訴,高等法院審理了後,八月二三改判,認定李慶安取得公職身分雖然有違法,但是伊擔任台北市議員kah立法委員期間並無hông撤銷抑是解除職務,所以伊領億外萬並是詐欺取得,並認定審理ê時檢方主張李慶安涉貪污罪ê「利用職務詐取財物罪」構成,判決宣告無罪。

        真濟人攏驚一跳,問講:「那會按呢?」藍色ê《聯合報》網站提供即時線頂意見調查一工,「接受」判決結果ê網友有6,330,「ē接受」ê人有2,282人,都相差三倍左右。按呢你tio̍h知一般人偌呢無法度接受。

        咱看李慶安早前按怎講?2008年五月底,李慶安向法院提出告訴,控告媒體報導伊有雙重國籍是「無中生有、混淆視聽」。伊ê委任律師替伊講:美國移民kah「國籍法」第349條規定,「年滿十八歲後接受、服務抑是執行其他政府官職,對hit-ê官職宣示、斷言抑是聲明效忠」,tio̍h會喪失美國國籍。1995四月十一,台北市議會第七屆第一次定期大會第10次會議,討論主題是副市長陳師孟、財政局長洪德生、交通局長濮大威三人ê國籍問題。中國國民黨議員秦慧珠強調:「按照國籍法,若就職進前猶未放棄雙重國籍,tio̍h應該撤銷伊ê職位,而且應該追溯到十二月二六,所領ê薪水mā tio̍h繳回,而且tio̍h追究陳(水扁)市長ê政治責任。」李慶安m̄-nā在場有聽tio̍h chiah-ê話,而且伊有連署臨時提案,李慶安主張有雙重國籍ê人送監察院,而且若有雙重國籍ê人,公職身份「ùi一開始當然tio̍h確定無效」。李慶安親目看tio̍h in原本behê陳師孟副市長早tio̍h有去辦理放棄美國國籍手續,平安無代誌;伊親目看tio̍h阿扁市長hit下晡隨時請兩位͘流彈彈tio̍h ê洪局長kah濮局長辭職。李慶安那有可能tio̍h愛去辦理放棄美國國籍手續美國國籍才會無效?

        高等法院合議庭講:「『兼有外國國籍ê身分』kah對中華民國應負ê『效忠義務』兩ê之間並無必然存在對立、衝突關係,並無影響具有雙重國籍者對效忠義務ê履行。」高等法院合議庭法官beh廢掉「國籍法」ê同時,請聽李慶安早前講ê話:若有雙重國籍ê人,公職身份「ùi一開始當然tio̍h確定無效」。

        咱原本干單知影會tàng用李慶安ê話塞伊ê嘴,知伊êchiah好用,tàng塞高等法院法官ê嘴。
 
< Prev   Next >