首頁 arrow 綠色短評 arrow 天平若歪去beh按怎?

天平若歪去beh按怎? PDF 列印 E-mail
發表者 李南衡   
2011/09/02, Friday
        八月三十一早起,法務部長曾勇夫去參加「最高檢察署賄選暴力督導小組」掛牌儀式中致詞講,頂禮拜雲林縣斗六市長補選,因為檢警調三方面查賄認真,有陣營柱仔腳原本beh買票,煞無地下手,另外一個陣營姓謝ê候選人以過去擔任鄉長ê政績得tio̍h選民ê認同所以當選。希望選舉tio̍h愛選賢kah選能,而且tio̍h杜絕賄選歪風。

 

        Chiah-ê話引起民進黨中央kah民進黨斗六市長落選者張聰明不滿,提出強烈抗議。認為法務部長曾勇夫影射該黨候選人原本beh買票,因為查賄認真煞無地下手。向台北地檢署按鈴控告曾勇夫涉及加重誹謗罪。

        九月初一,法務部次長陳守煌轉述曾勇夫對hôngê看法,伊講,部長尊重張聰明訴訟ê權利,日前佇最高檢察署掛牌儀式中部長所講ê話,重點佇表達政府查賄ê決心,並是針對特定政黨候選人有賄選情事。若是講話有無周延抑是無夠適當ê所在,若是張聰明有感覺伊個人名譽受tio̍h傷害,部長願意對張聰明個人表達失禮。

        曾部長會使講是一錯再錯,完全知影伊犯tio̍h啥物錯。作部長ê人那會使講:「有陣營柱仔腳原本beh買票,無地下手,另外一個陣營姓謝ê候選人以過去擔任鄉長ê政績得tio̍h選民ê認同所以來當選。」斗六市長有幾個人出來競選?兩個。一個當選ê,另外猶chhun幾個?一個落選êChe那像有一對翁仔某冤家,鄰長去做公親了後出來講:一個夯棍仔直直beh摃人,作翁婿ê緊閃開無愛kah伊起衝突。事後作某ê出來辯解講伊根本無夯啥物棍仔,鄰長烏白講。鄰長講,我並無講作某ê夯棍仔ah。借問,按呢你敢聽會落去?一對翁仔某冤家,攏總有幾個人?兩個。鄰長講「作翁婿ê緊閃開無愛kah伊起衝突」,「一個夯棍仔直直beh摃人」是指作某ê,敢猶有別人?講m̄-tio̍h會失禮就好,那會使koh強辯講「並是針對特定政黨候選人有賄選情事」咧!

        度量衡是計算長短、容積、輕重標準ê器具,有一種量輕重ê衡器叫作「天平」。天平是佇一枝桿ê雙旁吊細ê盤仔,一頭ê盤仔匟砝碼,另外一頭匟beh秤重ê物件,若是天平秤起來平平平,表示behê物件kah砝碼平重,大細粒砝碼有標示各種重量。世界真濟國家攏用天平作司法ê標誌,意思是講嫌犯所犯êkah判罪所引用ê法條有平重無?天平是代表公平、客觀、準確,佇一國內面,無論佇位、無論啥人攏是用仝一個標準,天平ê權威性會hông信賴。

 

        掌管全國上懸檢調系統ê法務部長亂講話,那像天平歪去,按呢beh按怎?

 

 
< 前一個   下一個 >