首頁 arrow 綠色短評 arrow 眠床腳ê不定時炸彈-維基解密!

眠床腳ê不定時炸彈-維基解密! PDF 列印 E-mail
發表者 李南衡   
2011/09/09, Friday
        前幾工,維基解密公布2008年台灣總統大選期間,當時桃園縣長朱立倫kah美國在台協會台北辦事處(AIT)處長楊甦棣ê談話,有講tio̍h王金平算命想beh選總統、有chhoē伊作副手;講馬英九beh愛連戰、宋楚瑜、吳伯雄、王金平等藍營眾頭人退場;koh講馬英九非常無合意宋楚瑜。媒體報導了後,新北市長朱立倫講,維基解密ê內容攏是事實,he顯然是楊甦棣抑是AIT人士個人 ê解讀。Che那像台灣俗語話所講ê:「無影無跡,講kah hiah對同。」趣味是猶有幾個台灣政治人物佇楊甦棣頭前講別ê政治人物是非,piak出來攏講伊無講。

 

        「維基解密」chit-ê秘密網站是2006年十二月設立ê2008年發表《Kenya:血teh哮》,得tio̍h國際特赦組織頒發「英國媒體獎」,2010年公布2007年巴格達空襲ê時,美軍殺害伊拉克平民ê影片了後,開始陸續公布一寡美軍機密檔案kah美國外交電報。咱chit遍所看tio̍h朱立倫kah AIT處長楊甦棣ê談話,就是屬美國外交電報部分。解密ê文件͘美國kah美國有關國家ê政治人物氣kahbehsiáu,因為維基解密一下公布,若像威力相當大ê炸彈,炸kah一寡政治人物滿面全豆花、炸kah siáu鬼仔殼落kah滿土腳、炸kah一寡政治人物歸個尻川攏hông看現現。包括美國在內真濟國家ê政府攏想beh kā「維基解密」負責人阿山志(Assange)掠起來剥皮袋粗糠!氣罔氣,實在是無法伊!因為維基解密所公布ê資料攏是真ê,到今仔日為止,全世界猶無一個當事者跳出來否認抑是解釋。

        中國對內防止中國人看tio̍h維基解密,維基解密公布ê任何資訊攏總͘「防火牆」擋掉,對外in干單會曉敦促美國解決洩密問題niā-niā。俄羅對外情報局官員對維基解密提出強硬宣告講:維基解密若敢公布任何俄羅ê機密,維基解密就會永遠佇世界上消失!按呢有歹無?有橫無?

        咱生活佇台灣應該感恩,感謝民主運動前輩ê犧牲拍拚,咱今仔日才會tàng自由欣賞維基解密。因為有維基解密,咱才知影2004年總統大選前,長榮總裁張榮發kah阿扁總統切,是因為中國施壓力;2008年中國阻止王金平呂秀蓮出席美國總統Obama就職典禮;中國kah台灣馬政府對非洲國家ê無成文協定,就是中國停止對非洲國家用數百萬美金援助來得tio̍h外交承認;2009年台灣會tàng以觀察員身份參加WHA是因為台灣同意以一個中國原則作基礎。原來一寡表面上看起來súi-súi ê代誌,內底有真濟得眾、臭mo-mo ê垃圾!

        維基解密那像匟佇眠床腳不定時ê炸彈,tang時仔會爆炸?知!炸彈有幾粒?知!害一寡心術無正ê政治人物睏落眠。咱老百姓卻看kah不止趣味!

 
< 前一個   下一個 >