首頁 arrow 綠色短評 arrow 核安無安,會真慘!

核安無安,會真慘! PDF Print E-mail
Written by 李南衡   
Friday, 16 September 2011
        針對核能發電廠第四廠(簡稱「核四廠」)有設一個「核四安全監督委員會」,是為tio̍h beh確保核四廠興建kah營運安全,根據行政院非核家園推動委員會核能電廠監督kah核四議題評估小組作業要點,tī 2004年三月設立ê。第四屆委員由四部分ê人士所組成:原子能委員會、專家學者、機關kah民意代表、地方政府kah民間團體代表。雖然四部分人士ê意見攏真重要,總是咱加減對原子能委員會代表kah專家學者ê意見,會khah重視、會khah注意。

 

        七月底,林宗堯委員佇核四安全監督會議中,發表五千字ê〈核四論〉,列出核四ê十大結構性錯誤,伊講,若無ùi根本「換一個方式來做」,核四絕對無可能安全運轉,要求台電做出結構性改變。伊講:台電進度慢並是慎重,是因為纜線施工錯誤重新鋪設;日本kah核四仝型「進步型沸水式反應爐」電廠,將全場儀控分作十三個獨立系統,台電核四要求全廠儀控tio̍h連結成作單一系統,致使訊號點接近四萬個,相當龐大複雜,全世界無第二間;全世界核電廠發包攏是統包,干單核四廠探取分包,che mā是全世界無ê。工程介面複雜無仝調,包商購料施工台電攏管bē-tio̍h。伊講:上好ê辦法是暫時停工!

        八月中旬,伊koh佇臨時會中提出「核四之計」,提出獨立審查等七個方案救核四。主持會議ê主席是兼原能會副主委謝得志,最後做出決議:「台電若改善,tio̍h beh建議核四年底進前停工。」無疑誤謝得志煞隨時辭官,伊講:「個人理念無一定拄拄符合原能會ê理念。」上好笑ê是中國國民黨立法院黨團書記長趙麗雲講:謝得志辭官,kah核四安全問題無關係。

        林宗堯是啥物人?伊以前是奇異(GE)kah貝泰核能公司ê工程師,bat參與國內外真濟間核電廠計畫,bat受貝泰核能公司派駐台灣核二、核三廠,最近是原能會佇核四工程、試運轉顧問,koh兼核四安全監督委員會委員。伊拒絕替核四背書,mā tī八月底辭掉核四安全監督委員。

 

        核四安全監督委員會副主席陳慧慈,伊是中央大學土木系教授,伊表示「會tàng了解林宗堯ê心情」,伊kah另外一位核四安全監督委員崔愫欣、伊是綠色公民行動聯盟理事,teh考慮辭職。

        原能會副主委謝得志、核能電廠專家林宗堯兩位內行人ê看法,若照按呢落去核四廠是真無安全,in建議台電改善。台電、行政院、總統攏無人插inin只好辭掉核四安全監督委員ê職務。核四廠ê安全無內行人監督,外行ê行政院長kah總統拍胸坎仔咱掛保證。知你會驚抑

 
< Prev   Next >