首頁 arrow 綠色短評 arrow 林俊義教授,阮感謝你!

林俊義教授,阮感謝你! PDF 列印 E-mail
發表者 李南衡   
2011/09/23, Friday
        美國留學轉來台灣了後四十外年來,林俊義教授一方面佇東海大學教冊、裁培一批一批ê學生佇台灣環保工作頂面用心盡力;一方面伊本人chhoā頭為台灣環保拍拚。受tio̍h今年三月十一日本大地動所引起ê核能發電廠災難,kah民進黨總統候選人蔡英文提出「2025非核家園計劃ê刺激,已經退休ê林俊義教授決定beh koh徛出來作志工,為台灣chit塊土地來貢獻心力。

 

        林教授足清楚,若是干單講「非核家園」,有可能會變作一句口號;照蔡英文所提出有時間性ê2025非核家園計劃」,才會變作一個理想。理想beh按怎達成?除了the̍h tio̍h政權用行政力推動以外,伊認為上重要是教育,按怎͘全台灣ê人瞭解啥物是核能發電廠,對台灣chit塊土地會有啥影響?kah生活佇台灣兩千三百萬人有啥關係?伊採取上傳統、上有效ê教育方法:培養種子教師。

        八月三十一,林俊義教授接受「主婦聯盟」ê邀請,舉行「打破核安神話」系列講座,向環保志工說明「你知影ê恐怖核電真相」。伊問環保志工:「你敢知影事後處理核災ê費用,至少是起一座核電廠費用ê七倍,甚至懸到七百倍!」核電是無人準作人ê科技,核廢料內底ê鈽,半衰期是兩萬四千七百年,完全無害tio̍h愛二十五萬年!伊講,伊thiau故意講͘人驚。林教授用日本福島核災作例,目前福島核電廠半徑六十公里範圍內ê土地差不多攏受污染,人類behùi污染土地生長出來ê動物植物,一定攏會受tio̍h污染。根據日本公布ê數據,福島ê137 ê量是當年廣島原子彈釋放ê一百六十八倍。馬政府kah台電一再向人民宣導核電真安全。伊講「根據外國經驗,一旦有人為操作無拄好,足容易發生核災,特別是反應爐出問題,tio̍h有爐仔心熔毀ê危險。」伊講核四廠一旦正式運轉,就是萬年ê怪獸。萬一台灣若發生親像福島ê核災,m̄-nā股市房屋攏會毀無去,人ê死傷koh-khah無法度估計,siáng都無地走。林教授一再提醒逐個:「人類一定愛khah謙卑一絲仔!」

        台灣基督長老教會總會舉辦「非核家園」種籽講師人才訓練會,八月二二、二三,佇台東新港教會開始,邀請林俊義教授去上課,ùi生態理論、核能發電真相、再生能源等,來探討「非核家園」ê迫切性。續落去九月初五、初六,佇台南富強教會。預定beh佇全台灣巡迴培訓反核講師,伊希望學員會tàng運用伊所講ê課程內容kah所發ê資料講義,佇教會、團契、社區來宣傳非核家園理念。

 

        林教授所做美好ê工,一定會佇全台灣湠開,「流目屎掖種êbeh出歡喜聲收割!」相信台灣會佇2025年進前變成「非核家園」。林俊義教授,阮感謝你!

 
< 前一個   下一個 >