首頁 arrow 綠色短評 arrow 入聯合國路途真khâm-khia̍t

入聯合國路途真khâm-khia̍t PDF 列印 E-mail
發表者 李南衡   
2011/09/30, Friday
        八月二三,巴勒斯坦(Palestine)總統阿巴斯(Abbas) 向聯合國秘書長潘基文遞交成作聯合國第194個會員國ê申請書,而且佇聯合國大會發表演講。伊講,以前佇國際和平ê努力,「因為以色列無beh讓步」才攏失敗,巴勒斯坦人希望聯合國會tàng佇解決巴以衝突中發揮koh khah大ê作用。

 

        八月二八,聯合國安理會將巴勒斯坦ê申請書交hō͘一個特別委員會,chit-ê委員會審議巴勒斯坦ê入聯申請了後,會決定巴勒斯坦是是有達到作為一個正式國家ê條件,內底有一項是,有明確ê邊界線kah有得tio̍h各方承認ê政府。根據聯合國憲章,新ê成員國一定tio̍h愛好和平。審查結果會先向安理會成員報告,安理會才決定是beh將巴勒斯坦入聯申請交聯合國全體代表大會來投票表決。che有可能會拖一站時間攏無結果。

        巴勒斯坦分作:加薩走廊、約旦河西岸kah東耶路撒冷三塊土地,面積鬥起來有6,031平方公里,差不多台灣ê六分之一,人口有380萬人,差不多是台灣ê六分之一。雖然土地細人口少,但是因為伊佇歐亞非三大陸交插ê所在,地理位置特殊,自古以來一直是兵家必爭之地。目前全世界有131國、超過三分之一ê國家承認巴勒斯坦chit-ê國家。英國國家廣播公司(BBC)佇全球進行一項調查顯示,支持巴勒斯坦以獨立國家加入聯合國ê人數比反對ê khah濟,chit項佇十九個國家進行ê調查,有49% ê民眾支持巴勒斯坦ê立國主張,21% ê人表示反對。

        美國早早就放調講會佇巴勒斯坦申請入聯投否決票。咱知中國、英國、美國、法國、俄羅chit五個安理會常任理事國任何一個若投否決票,啥物案都無法度通過。巴勒斯坦入聯合國路途真khâm-khia̍t應該會真遙遠才tio̍h

        斡頭看咱家己,無論土地人口台灣攏是巴勒斯坦ê六倍,咱佇經濟、科技ê發展,抑是自由、民主、人權ê表現,攏擺佇世界ê頭前名。Mài講承認咱是一個國家才23個國家,顚倒是巴勒斯坦ê六分之一niā-niā,上重要是聯合國安理會常任理事國有一國會支持咱?上有可能ê是美國。但是咱一定愛會記得,2004年十月二五,當時美國國務卿鮑威爾(Colin Powell)講:「台灣是獨立ê,無享有國家ê主權。」2007年八月三十,美國國安會專管亞洲事務主任韋德寧(Dennis Wilder)講:「第一,台灣是中華人民共和國ê一部分;第二,中華民國抑是講台灣,並是有主權ê國家。」

        雖然前無偌久,美國眾議員提出一項決議案,支持台灣成作聯合國ê完全會員。總是咱若看巴勒斯坦ê遭遇,咱tio̍h覺悟:入聯合國路途是真khâm-khia̍t

 
< 前一個   下一個 >