首頁 arrow 綠色短評 arrow 管伊宋楚瑜創啥?

管伊宋楚瑜創啥? PDF Print E-mail
Written by 李南衡   
Friday, 07 October 2011
        今年五月十六,親民黨前僑選立法委員高資敏,就是早前佇美國舞一個親中國國民黨ê「台灣同鄉聯誼會」kah原本台灣人ê組織「台灣同鄉會」拚館hit-ê人,叫逐個tio̍h連署宋楚瑜出來拚明年2012總統大選,喝「省長阮beh愛你作總統」ê口號。六月初七宋楚瑜接受電視訪問,講逐工都有人來勸伊出來,伊並無煩惱連署ê問題。che攏會tàng看出宋楚瑜一直有想beh選總統。七月二五,《自由時報》專訪宋楚瑜ê時,伊講2012一定會參選!選啥?伊無講死。若是干單選一個立委,動作無需要hiah大。八月十一接受電視專訪,宋楚瑜講伊beh選總統ê氛圍已經ùi0到1ah!有夠假仙。九月初一,宋楚瑜接受電視訪問才正式表態講會向中選會領連署表格,成作總統選舉ê「被連署人」,有beh選無?伊講連署若超過一百萬人,kohchhoē tio̍h適當ê財源,伊就會拚2012大位。續落去宣布副手kah開始連署,chit兩個月中,宋楚瑜無用tio̍h一兵一卒、無開伊一錢(sián)五厘(lìn),靠伊一支嘴,就會tàng hō͘一份報紙、三間電視台作專題訪問,差不多無一個電視台ê政論談話性節目無講tio̍h伊參選總統ê意願kah動向,民調會tàng一直維持佇十葩至十五葩之間。Chit點咱bē tàng無佩服宋楚瑜ê厲害,確實是一個知影按怎操弄新聞媒體ê高手。

 

        咱應該足清楚,為tio̍h顧守台灣,明年2012 chit場大選是beh kā直直向中國欹過去、無顧台灣主權ê馬英九政府偃倒。有人對宋楚瑜存有幻想,其實宋ē比馬ê koh khah傾向中國,選͘宋楚瑜敢chhoā尿ê去換tio̍h siàmê?咱明年總統大選,就是beh kā烏白開啥物「六三三」、「黃金十年」chit種空殼支票ê白賊九仔偃落台。有人對宋楚瑜存有幻想講伊真gâu做代誌,其實伊省主席kah省長任內上gâu ê就是四界掖錢,親像華語童謠唱ê「要五毛給一塊」,烏白開咱人民ê錢,那是伊偌gâu做代誌?gâu做代誌,the̍h兩個仔政績͘咱看māi!無半項。

        咱若ùi 2010年五都選舉ê結果來看,雖然五都嬴兩都niā-niā,但是總得票數民進黨the̍h tio̍h 三百七十七萬外票比中國國民黨ê三百三十六萬外票,加四十萬三千三百二十一票,扣掉高雄楊秋興四十二萬外票佔5.59,五都市長選舉民進黨the̍h tio̍h 49.87葩、嬴中國國民黨5.33葩。

        所以2012 chit場總統大選,咱台灣人訂ê目標就是蔡英文beh嬴馬英九2葩至6葩,也就是蔡英文the̍h 51葩至53葩,以外47葩至49葩看是馬英九一個人beh the̍h?抑是宋楚瑜有參選beh kahē按怎去分,heinê代誌。

        咱台灣人目標訂好勢、心肝掠͘ chāi,管伊宋楚瑜創啥?

 
< Prev   Next >