首頁 arrow 綠色短評 arrow 超級變變變!

超級變變變! PDF Print E-mail
Written by 李南衡   
Friday, 21 October 2011
        十月十七,馬英九佇主持「黃金十年、國家願景」最後一場說明會講,若是符合國家需要、民意支持、國會監督三原則,政府未來十年會推動兩岸簽署和平協議,而且照順序推動兩岸互設辦事機構。伊講若時機kah條件成熟了後,才會踏出che一步。

 

        十月十九,民進黨主席蔡英文開記者會,針對馬英九ê講話提出「四個危險、三個堅持」講,第一個危險是犧牲台灣主權。馬總統無用主權堅持作前提,那像台灣捒入去中國佇「反分裂法」所設定「和平統一」ê政治框架內底;第二個危險是可能改變台海現狀,會落入去兩岸事務是屬中國事務ê陷阱內底;第三個危險是危及民主價值,chit種匆碰無慎重ê做法,m̄-nā是無尊重民意,而且會製造社會爭議kah對立;第四個危險是破壞兩岸之間處理中國問題ê深度。伊進一步表示,兩岸會使佇無設政治前提下面進行對話,但是若是牽涉tio̍h國家定位ê兩岸協商,tio̍h應該堅持主權、堅持民主kah堅持和平。第一,必須堅持主權,任何兩岸協商bē-tàng以「一個中國」作政治前提;第二,必須堅持民主,任何牽涉tio̍h變更台灣現狀ê政治協商結論,必須以公民投票作前提;第三,必須堅持和平,堅持中國一定tio̍h撤除對台灣ê武力威脅,放棄武力威脅ê意圖。

        tio̍h蔡英文講公投,hit暗半暝仔,總統府發言人臨時緊表示講,假使未來若beh推動兩岸和平協議,一定會先交付人民「公投」。公投?咱猶會記得民進黨喝beh入聯合國公投、主張behECFA應該公投,馬英九in kā公投看作是台獨,一向反對公投!行政院長吳敦義講無必要公投,公投是政府無法度做出決定,才會行到公投chit步。今講beh推動kah中國簽署和平協議,驚台灣人反對緊變講beh公投。第二工馬英九koh變,講公投是一定哦,只是一種選項。

        1991年馬英九kah陳水扁接受台大學生會邀請進行「修憲制憲」辯論會,馬英九堅持tio̍h保留國民大會,總統應該由國代間接選出。陳水扁堅持由人民直選總統。反對人民直選總統ê馬英九,人民直選伊變作總統,那會無koh反對?

        1992年中國國民黨十三全三中全會ê時,馬英九對記者講ê話,今仔日那像koh一遍teh對台灣人講:「今我講ê話,恁敢猶會相信嗎?」

        馬英九͘咱想起「日本電視台」有一個綜藝節目叫作《阿欽ê假裝大賞》,ùi 1979年十二月三十一播到今,非常受歡迎。台灣有電視台買來播出,換名叫作《超級變變變》足濟人愛看,因為ingâu變,變kah真趣味。

        馬英九超級變變變,已經變作超級騙騙騙,看kah真無趣味!

 
< Prev   Next >