首頁 arrow 綠色短評 arrow 咱看蔡英文按怎軟索牽豬!

咱看蔡英文按怎軟索牽豬! PDF Print E-mail
Written by 李南衡   
Friday, 18 November 2011
        民進黨總統候選人蔡英文宣布九月十二beh去美國訪問,中國國民黨總統候選人馬英九ê分身金溥聰緊九月初九早一步去美國;蔡英文十月初三去日本訪問,馬英九ê分身金溥聰mā toè人十月十九去日本訪問。你去到toè

 

        八月二四,蔡英文提出「十年政綱」-未來十年台灣發展ê政策綱領,是hō͘後一代ê承諾書,台灣人講,若民進黨執政面對未來十年beh按怎治理台灣。十月十二,中國國民黨總統候選人馬英九提出「黃金十年」全面建設願景。

        民進黨總統候選人蔡英文呼籲逐個小額捐款hō͘phí-phí ê民進黨作競選經費。舊年股利二十九億ê中國國民黨mā toè民進黨請逐個小額款hō͘中國國民黨,莫怪hông罵講是員外teh kā乞食分錢。

        民進黨總統候選人蔡英文「台一線」造勢,來到苗栗新竹桃園客家莊ê時,有客家阿姨阿婆大聲喝講:beh選「客家妹」(hak-ká-moe)作總統,因為蔡英文ê外公Holo人、外媽原住民,老父是客家人。十一月十四,中國國民黨總統候選人馬英九參加「全球客家懇親大會」ê時,koh一遍強調伊kah客家人ê淵源,講伊身為一個客家人真光榮,講客語,用客語吟唐詩「烏衣巷」、唱客家歌。

        民進黨總統候選人蔡英文三隻豬仔子舞kah chhiāng-chhiān滾,用豬仔子捐錢hō͘蔡英文變作全民運動。馬英九緊送人「台灣平安符」。

        十月二五,蔡英文出版《洋蔥炒蛋到小英便當》-蔡英文ê人生滋味。十一月十七,馬英九出版《傾聽與對話》-二十幾篇治國周記。

        藍營名嘴批評蔡英文kah民進黨傳統造勢ê方式無仝,完全曉選舉;民進黨ê支持者一直煩惱蔡英文傷過溫柔細膩,應該khah歹,khah惡;蔡英文ê支持者氣中國國民黨逐項攏toē人做、toē人行。事實上,In完全無瞭解che就是蔡英文,軟軟仔來。伊若大細聲敢是會對手拍tio̍h驚?蔡英文輕聲細說、寛寛仔來,手裡ê索仔若擲有tiâu,對手一定會直直toè伊行。

        民進黨長期以來一直主張關係國家大事、公眾利益等議題tio̍h愛公投,而且強烈要求修改「鳥籠仔式」公投。十月十八,馬英九總統佇說明伊「黃金十年」ê時,講未來十年內簽署兩岸和平協議。蔡英文唱聲任何政治協商攏tio̍h經過公投,害總統府發言人半暝仔緊跳出來講馬英九主張tio̍h公投。Chit聲害ah!全台灣ê人驚一跳,中國hit旁聽tio̍h公投真爽,馬英九那像雞kui仔消風去,攏koh講啥。那像豬toètoè傷徛行傷雄,踢tio̍h家己ê腳,險險跋一倒。

        Chit遍總統大選,咱看蔡英文按怎軟索牽豬!真趣味。

 
< Prev   Next >