首頁 arrow 綠色短評 arrow 啥人是台灣人?

啥人是台灣人? PDF 列印 E-mail
發表者 李南衡   
2011/12/09, Friday
        今仔日十二月十二是丁德貞修女八十九歲生日。咱實在無面來向丁修女講:祝你生日快樂。所有猶有一絲仔良心ê台灣人,攏會見笑kah出嘴,對一位chiah呢有愛心四十年久疼惜台灣ê丁修女,小可知影伊老來ê遭遇ê人,攏歹勢kah m̄知影咱êbeh夯去藏才好。

 

        1922年,丁德貞修女佇西班牙出世,高中畢業後發願作修女就入去天主教耶穌孝女會培訓,二三歲離開伊ê故鄉西班牙,奉派到中國安徽省安績縣天主教創立ê孤兒院服務,teh照顧囡仔ê同時kah in學華語,一直到中華人民共和國建國了後,共產黨強力外籍傳教士趕離開中國,1953年丁修女來到台灣,聽tio̍h佇台北樂生療養院有一群生活悽慘、無見tio̍h天日生活ê「漢他病」患者、也就是咱一般所講ê「癩哥病人」,1962伊決意beh去幫助in,主動去樂生療養院。咱知漢他病是一種慢性傳染病,患者ùi腳手指頭仔開始爛,一節一節慢慢失去知覺,皮膚歹死潰爛孔嘴會發出惡臭,一般人鼻tio̍h走那飛咧。但是丁修女驚傷tio̍h患者ê心,除了無掛嘴om無帶手套,koh kah in有講有笑,幫in換清氣衫,致使期待丁修女來幫in洗身軀煞成作每一位患者生活ê重心。

        有時患者會向丁修女吐苦水,心肝底ê委屈kah不平哭͘丁修女聽,特別是intio̍h病友一個一個老去,感慨家己那像͘社會放sak、無人愛ti̍h ê人,丁修女攏是溫柔kā in安慰,kā in講事實上世間猶有比in koh khah不幸ê人,伊時時為in祈禱祝福,丁修女成作患者上溫暖ê倚靠。有幾位目睭無看tio̍h ê患者講,intàng感受丁修女有出現佇in中間抑無,因為丁修女若出現in隨時會佇空氣中鼻tio̍h快樂歡喜ê味。

        Chit位為樂生療養院患者服務將近五十年ê丁德貞修女,2005hông選作第十五屆醫療奉獻獎得主。但是chit幾年來年老ê丁修女煞患tio̍h失智症而且久長以來倒佇病床。丁修女雖然有領tio̍h台灣長期居留證kah健保卡,但是卻無法度申請居家照護kah復健服務。是按怎?移民署ê回答講:因為伊「是台灣人」。因為伊無主動放棄西班牙國籍、乖乖「歸化」作中華民國國民,所以無法度得tio̍h居家照護ê服務。

        台灣人?相信伊住佇台灣比一半以上ê台灣人住khah久,相信伊為台灣所付出ê心血比一半以上ê台灣人付出khah濟,相信伊對台灣ê疼心比一半以上ê台灣人koh khah大。

 

        移民署講丁德貞修女是台灣人。借問咧,啥人是台灣人?

 
< 前一個   下一個 >