首頁 arrow 綠色短評 arrow 選立委mā會改變台灣未來!

選立委mā會改變台灣未來! PDF 列印 E-mail
發表者 李南衡   
2012/01/06, Friday
        立法委員選舉制度ùi頂屆2007年開始改作單一選區兩票制,立委人數減半。攏總113席立委,民進黨大敗才the̍h 27席,中國國民黨大嬴the̍h 81席、佔總席次四分之三優勢,民進黨立委拄拄人ê三分一,老實講佇立法院beh表決啥物,你夯雙手猶輸人。免怨歎,攏是台灣人民決定ê,那像四冬前選͘馬英九作總統,chit四年來哀父叫母無話講!好佳哉,民主政治四年就有一遍選舉,頂遍總統選馬英九、四年來歸腹肚火êchit遍會使換掉、選͘蔡英文。

 

        立法委員咧?「公民監督國會聯盟」常務理事顧忠華講:chitê國會因為席次減半、選制改變,照理講應該有koh khahê表現才tio̍h,結果是m̄-nā立法效能無理想,無發揮監督ê功能,定定通過有爭議性ê法案,chitê立委看家己細漢,甘願失格變作行政院ê「立法局」。前立委林濁水批評chit屆立委ê表現,是國會全面改選以來負面評價上濟ê一屆。新台灣國策智庫兼任研究員羅承宗表示,預算審議是國會重要ê職權、應該慎重認真審議,替納稅人顧金袋仔,m̄-nā是在野黨立委ê工課,是歸個國會ê工課。像講2012度總預算歲出ê刪減率約0.007%、一億三千外萬,猶比建國百年舞台劇〈夢想家〉所開ê二億外koh khah少,證明立法院已經完全喪失審議預算ê功能。Chitê立法院無換血會khiau去!Beh按怎歹血換掉?趁chit遍立法委員改選ê機會,好好來選立委。

        Chit遍立委選舉逐個愛kha̍h拚勢一下,上好是͘民進黨立委過半,若無,至少͘綠營ê立委過半,按呢蔡英文若當選總統,才親像阿扁總統八年ê立法院按呢「朝小野大」-執政黨立委kha̍h少、在野黨立委kha̍h濟亂亂舞,總統真歹做代誌。舉例來講:2005年阿扁總統執政時代,中國國民黨kah親民黨立委看國安會秘書長邱義仁爽,就決定總統府秘書長kah國安會秘書長約33萬院長級薪水降作18萬部長級薪水。2010年中國國民黨執了,中國國民黨立委就決定總統府秘書長kah國安會秘書長恢復作院長級薪水。你講有亂來無?無法度,in立委人khah濟。

        立委beh按怎選?老實講,中央選舉委員會宣傳了足無夠。咱chit遍選舉叫作「三合一選舉」,你一遍愛tǹg三張票,一張選總統你kā tǹg hō͘一號蔡英文;一張選「區域立委」你kā tǹg hō͘你合意ê候選人,作恁hitê立法委員;第三張是選「不分區立委」,是選人、是選政黨,照每一黨得票比例來分「不分區立委」ê名額。比喻講,民進黨是三號、台聯是四號。

        台灣beh變作啥款由你來決定。m̄-nā選總統,選立委會改變台灣未來!

 
< 前一個   下一個 >