首頁 arrow 綠色短評 arrow 「九二共識」,無就是無!

「九二共識」,無就是無! PDF 列印 E-mail
發表者 李南衡   
2012/01/28, Saturday
        Chit遍總統大選,上hō͘人想曉、上無法度理解ê是:馬英九一再提起「九二共識」,配合中國政府講:「九二共識」是兩岸和平發展ê基礎,若無「九二共識」就無可能恢復協商kah談判。事實上,1992年台灣海基會kah中國海協會佇香港商談ê時,中國方面堅持「一個中國」原則,台灣方面講:雖然是一個中國,恁講ê是「中華人民共和國」,阮講ê是「中華民國」,也就是「一中各表」,兩旁根本講對同,所以若講雙方有一個「共識」就是雙方「無共識」。那像,陳先生講beh kah李小姐結婚,李小姐講伊無beh kah陳先生結婚。tang時仔,李小姐chit旁有人講in兩人有「共識」,但是講李小姐無beh kah陳先生結婚,講kah真細聲,甚至到路尾看陳先生hit旁有錢搡勢(sáng-sè)koh是烏道出身ê,煞完全敢講in早前講ê是講in兩個無「共識」chit-ê「共識」。

        2000年,中國國民黨政府beh落台進前,陸委會主委蘇起發明一句「九二共識」,hō͘中國歡喜kah beh死,那像天頂落落(lak-lo̍h)來ê一項禮物,in tio̍h那誦經按呢逐工the̍h來唸,愈唸愈續嘴。無疑誤馬英九政府上台以後,國共兩黨親像一個童乩拄tio̍h一個桌頭,兩個鬥一擔。馬英九政府得tio̍h暫時ê安定無事,無惜tio̍h犧牲台灣主權,toè中國大聲喝「九二共識」。上明顯ê例是「世界衛生經織」(WHO)kā台灣矮化作中國ê一省,因為「九二共識」就是海峽兩岸攏承認「一個中國」,國際上攏有聽tio̍h,但是台灣原本主張ê「一中各表」(你講中國是中華人民共和國,阮講中國是中華民國)佇國際上喝出聲,根本無人知影。

        上夭壽ê是中國逼台灣佇中國有投資ê大頭家佇選前兩工徛出來講,in真歹想像無九二共識ê兩岸關係,koh khah無法度理解有人相信無九二共識。咱比in koh khah無法度理解有人明明無ê「九二共識」講作有。

        中國共產黨kah中國國民黨chit兩個雙生仔黨,相信早前德國獨裁者Hitler ê宣傳部長戈伯仔(Goebbels)所講ê話:「白賊話若講十遍,講一百遍,講一千遍,tio̍h會變作真理。」m̄-nā按呢,in mā認為「白賊話若khah濟人講,會變作真ê。」

        若講tio̍h白賊,真濟人隨時會想起美國總統Lincoln ê話:「你有可能一時欺騙所有ê人,有可能永遠欺騙一部分ê人,但是你無法度永遠欺騙所有ê人。」真失禮,馬英九比美國Lincoln總統khah巧,伊知影:「一時欺騙一部分ê人,hit部分ê人若有一個數額,伊tio̍h會當選總統。」騙會過tio̍h好!

        雖然chit遍馬英九騙過六百八十九萬外人當選總統,但是咱猶原堅決支持蔡英文講實在話ê精神:「九二共識」,無就是無!

 
< 前一個   下一個 >