首頁 arrow 綠色短評 arrow 邱毅ê悲情抑是實情!?

邱毅ê悲情抑是實情!? PDF Print E-mail
Written by 李南衡   
Friday, 03 February 2012
        立法委員選了,kah逐個所預料ê結果仝款,邱毅落選。高雄市第七選區民進黨趙天麟九萬八千外票當選,中國國民黨邱毅八萬三千外票落選,差一萬五千票,會當koh hō͘一個金門立委加一個馬祖立委當選,使講差無濟。敗選之夜,邱毅表示,「雖然有發現tio̍h地下賭盤ê存在,若準我有去kā iah猶原無法度阻止地下賭盤影響選情。」伊koh強調講,伊猶原深深受tio̍h選民歡迎,hit-ê受歡迎ê程度,「佇中華民國選舉史頂面,前所未有ê。」咱準作笑話聽聽一下tio̍h好。因為伊若有影chiah呢受選民歡迎,何必佇立法院會場流目屎咧?koh何必表示「後悔」踏入政界,考慮離開傷心地咧?

 

        咱知,chit幾年佇電視談話性節目中上蓋chhèng ê一個人,會使講是邱毅。伊làng頓無làng日,佇電視頂面用散子仔銃拍鳥仔,烏白拍加減會拍tio̍h一兩隻歹運ê鳥仔,講你犯tio̍h叼一條法、涉tio̍h叼一項弊案,害當事者掰(poé) bē離。等到代誌舞清楚,還當事者完全清白ê時,伊煞講雖然無犯法無違規,但是按呢「社會觀感」無好。伊減講一句,「社會觀感」是我邱毅講歹去ê!當伊chhèng kahbē-tiâu ê時,用腳頭u知影,一定是有一個火藥庫不管時teh提供伊拍ê銃子。悲哀ê是伊真可能幻想家己是藍營第一勇ê銃手。

        邱毅ê悲哀͘我想起中國歷史上漢朝一個真正gâu相戰ê開國功臣韓信。伊當chhèng ê時,全天下ê刀器攏tio̍h刻「不斬韓」三字。當時齊國有一位辯士蒯(koái)講,永過春秋時代越國有一位復國大功臣范蠡(lé),復國成功了後隨時逃走離開越王,而且寫批͘作宰相ê朋友文種講:「狡兔盡、走狗烹;飛鳥盡、良弓藏。」(意思是講去拍獵兔仔死了,走狗tio̍h掠來刣煮來食;飛鳥拍完,拍鳥仔ê phia̍ktio̍h收起來囥。)文種想講越王那有可能chiah殘?無聽苦勸結果͘越王刣死。等到韓信beh hông用索仔絞死進前,才想起蒯通ê話,怨歎講,天下已經拍定落來á,我chit隻走狗tio̍h hông刣死煮來食!

        當然,邱毅無法度kah文種、韓信比並!總是伊佇落選了怨歎講:藍營高層對伊ê看法是「會tàng利用,bē tàng重用。」當然,馬英九無管偌呢無情,無可能邱毅準作走狗刣來食。邱毅會thiāu故意講chiah-ê話,一來可能表示伊有自知之明,二來可能是希望馬英九聽伊按呢講會想tio̍h愛報答伊。

        上蓋悲哀ê是伊失志講ê話:「上無會tàng轉去大學教冊。」政務官抑是國會議員行無路就講beh轉去大學教冊。邱毅是頭一個、mā m̄是上尾個。咱有一個疑問是:大學敢是糞埽桶?

 
< Prev   Next >