首頁 arrow 綠色短評 arrow 當高雄之光照耀全球ê時

當高雄之光照耀全球ê時 PDF 列印 E-mail
發表者 李南衡   
2012/02/10, Friday
        二月初三,美國一本旅遊雜誌發布消息講:每工有350萬人看ê一個網站,最近票選全球十五個上美ê地下鐵車站,第一名加拿大蒙特婁戰神廣場站,第二名台灣高雄美麗島站,第三名新加坡樟宜機場站,第四名台灣高雄中央公園站,第五名北朝鮮平壤復興站。前五名高雄捷運the̍h兩個,高雄之光照耀全球。

 

        美麗島站是高雄捷運紅線、黃線ê交接點,大型ê玻璃公共藝術「光之穹頂」是義大利水仙大師設計ê,直徑30米、有660平方米ê穹頂,teh講人類編年史:水,生命ê孕育;大地,成長kah繁茂;光,創造ê精神;火,毀滅kah再生,歸ê穹頂就是teh表達愛kah寛容。伊用ùi德國運來ê 4,500片彩色玻璃拚接,將近四年ê時間才完成。光,穿透過無仝色ê大片彩繪玻璃色塊,展現出各種景象,連大型ê圓柱仔是彩色玻璃。每一位旅客來到chia一定會停落腳步來欣賞、來阿佬。中央公園站佇高雄捷運紅線頂,是兩層ê地下車站,歸ê車站充滿紫色,中庭ê斜坡草埔仔頂開誠濟對比色ê黃色風車,足親像開歸山坪ê日頭花。無論是行樓梯抑是搭電扶梯ê人,攏忽然間會元氣百倍起來。

 

        今仔日,高雄捷運會tàngtio̍h chit項榮譽,ùi開始規畫到正式通車營運ê歷任市長,包括謝長廷市長、陳菊市長,以及陳其邁kah葉菊蘭兩位代理市長,攏有貢獻心力值得咱說謝,in mā攏真歡喜才tio̍h

        事實上應該上歡喜ê是陳敏賢副董事長。伊人咧?先去ah

 

        2005年邱毅ùi一張高雄捷運標單開始“iah”高雄捷運「弊案」,續落去照劇本一件一件“iah”,一工一工佇電視台“piak”,一“iah”煞收煞,當時副董事長陳敏賢拍kah那像是「五惡不赦」ê大歹人:違法引進外勞案,namah-cón圖利天成公司案,公辦六標違法案,公共藝術無依法招標案,私吞李登輝三千萬案,五項罪加起來二十年刑期走去。koh動用大批檢調人員搜索陳敏賢厝kah公司,搬一大堆帳冊去。舞四年外,有ê查歸晡查無實據簽結,有ê佇一審tio̍h hông判無罪。這期間陳敏賢副董事長雖然誠鬱卒,但是堅信司法一定會還他清白,猶原盡心盡力teh為高捷拍拚。2009824腦充血中風住院。當時新聞界前輩吳春貴先生按呢寫:「陳敏賢中風倒佇病院,佇病情上嚴重ê時,(最後一案)違法引進外勞案hông判無罪,inê人覆佇伊耳仔邊chit-ê消息,伊表情無反應,但是ùi目睭尾有滴幾滴目屎落來。幾工後伊就抱憾離開chit-ê世間。」

        當高雄之光照耀全球ê時,卻͘咱想起hit-ê名嘴ê夭壽面,看tio̍h檢調ê黑暗面。

 
< 前一個   下一個 >