首頁 arrow 綠色短評 arrow 借問馬總統,今「三管五卡」走tó去?

借問馬總統,今「三管五卡」走tó去? PDF 列印 E-mail
發表者 李南衡   
2012/03/09, Friday
        美國牛肉一直有teh進口,咱以2010年來講,干單去骨牛肉有3405萬公斤、帶骨牛肉有112萬公斤、牛筋有18萬公斤。馬政府最近講beh「有條件開放瘦肉精牛肉進口」,Che kah早前咱政府為tio̍h人民健康,仿歐洲聯盟ê規定:「零檢出」,一絲仔瘦肉精都不准有ê想法無仝。

 

        講tio̍h瘦肉精,koh開始͘台灣人煩惱、緊張。各縣市政府衛生局出動大批人馬,去大賣場、超級市場查牛肉有瘦肉精抑無。續落,去查牛排館,新北市查tio̍h大間連鎖店“Friday”有使用含有瘦肉精ê美國牛肉,tehê牛肉帶轉去化驗,查出來是進口商「裕賀」買ê,准in kā chhun ê牛肉攏總封存要求退貨;M̄-nā按呢,續落koh查出高級餐廳「法樂琪」也tio̍h鏢,查出來in ê牛肉是向進口商「樹森」買ê,新北市衛生局餐廳內ê牛肉攏帶轉去化驗;台中市「鬥牛士」ê牛肉也tio̍h鏢;高雄市中華店「我家牛排」(牛肉是高雄宏喬實業公司提供ê)、岡山中山店「貴族世家」(牛肉是新北市貴族世家公司提供ê),兩間大間連鎖餐廳也tio̍h鏢。另外有幾間進口商承認有進口過瘦肉精美國牛肉,總是攏已經賣了了去ah!連MOMO購物佇網路賣ê牛排mā hông驗出有瘦肉精。

        三月初九新聞報導:消基會最近koh一遍抽檢市面上ê牛肉,ùi超級市場、大賣場kah牛排餐廳抽查十五件樣品,其中有四件驗出1ppb以上ê「萊克多巴胺」瘦肉精,佔27葩,有夠驚人!十五件牛肉有九件是美國牛肉,四件澳洲牛肉,二件本地牛肉。Koh khah驚人ê是無合格chit四件攏總是美國牛肉,會使講美國牛肉44葩有瘦肉精。

        各縣市政府為tio̍h人民健康無閒chhih-chhih,咱感謝kah阿佬。但是,老實講實在是加無閒ê。佇大賣場、超級市場、大餐廳甚至購物網路,檢驗tio̍h含有瘦肉精ê美國牛肉,應該隨時掠源頭-進口商,查封chit幾間進口商倉庫,而且公布͘所有batchit幾間進口商買美國牛肉ê買主知,請in一日內退貨。源頭若斷,那tio̍h煩惱下游商家餐廳咧?Koh khahê辦法是政府佇商家進口牛肉ê時嚴格管制,按呢tio̍h bē有瘦肉精ê美國牛肉流入市面,敢是?

        雄雄想起馬政府 2009年十一月講:chit遍放寬美國牛肉進口,請逐個安啦!因為政府有三管五卡顧tiâu-tiâu,國民健康上優先!三管是管源頭、管邊境、管市場。五卡是核對逐項證明、明確標示產品資訊、開箱進行嚴密檢查、切實檢驗食品安全、資訊chek時連線查明。

        借問馬英九總統,今(ta)「三管五卡」走tó去?

 
< 前一個   下一個 >