首頁 arrow 綠色短評 arrow 中國政府beh閹律師囉!

中國政府beh閹律師囉! PDF Print E-mail
Written by 李南衡   
Friday, 23 March 2012
        最近中國司法部下令beh建立律師宣誓制度。宣誓誓詞是按呢:「我志願成作一名中華人民共和國執業律師,我保證忠實履行中國特色社會主義法律工作者的神聖使命,忠於祖國,忠於人民,擁護中國共產黨的領導,擁護社會主義制度,維護憲法kah法律尊嚴,執業為民,勤勉敬業,誠信廉潔,維護當事者合法權益,維護法律正確實施,維護社會公平正義,為中國特色社會主義事業努力奮鬥。」司法部三月二十講,宣誓對促進律師ùi執業中建立正確的職業價值觀有幫助。

        誓,原本的意思是佇神明(抑是講「天」)的面前咒誓(chiù-choā),講一定會照約束來行,若違背甘願受神明責罰。美國總統就職的時,手按《聖經》宣讀誓言。中國共產黨是無神無教的無神論者,in到底beh向啥物宣誓?若是向in-ê國旗「五星旗」宣誓,敢無違反「唯物論」所反對的「迷信」?

 

        中國為tio̍h逼律師保證忠實履行中國特色社會主義法律工作者的神聖使命,命令此後佇the̍h tio̍h律師執業證書三個月內,tio̍h分批集中進行宣誓。全世界的律師若是有宣誓,上重要是「遵守憲法kah法律」,續落是「維護當事者的合法權益」。那有逼律師tio̍h「擁護中國共產黨的領導」chit種字句的道理咧?佇《孔子家語》內底的一段話:學生子貢問講:「你若咒誓,敢會使無照呼照行?」孔子應講:「講話當然愛有信用。但是若是hông逼去宣誓,tio̍h無算是正義。」意思是講hithông逼去宣的誓無算數。

        Koh再講,全世界一個官員宣誓是講伊beh奉公守法?官員就職宣誓若有效,2004年頂半年,中國beh那有八千三百外名貪官走去外國,另外有六千五百外名貪官佇國內失蹤,hitbeh那會查tio̍h六千八百三十億人民幣ê貪污?2011年中國鐵路部piak孔,鐵道部長張志軍涉嫌貪污落台,伊的下腳手、hông稱作「中國高鐵總設計師」的張曙光貪污二十幾億美金藏佇國外。

        最近一二十年來,中國出一寡驚死、經常替弱勢者維護人權、替in拍官司的律師,in hông叫作「維權律師」,in定定kah流血流滴,甚至煞hông判刑掠去關,關了出來koh為弱勢者的人權拍拚。In hō͘中國政府上頭殼疼的是,in告訴的對象大部分是各級政府。咱知,中國各縣市政府「常委書記」(若像佇台灣中國國民黨各縣市黨部主委),比各縣市長koh khah大,koh khah有權,koh khah有力,也就是「以黨領政」。今仔日,中國政府逼律師tio̍h宣誓:「擁護中國共產黨的領導」,此後,beh叫律師按怎kah政府相告咧?

        中國政府beh閹律師囉!hit款的中國你敢會合意?

 
< Prev   Next >