首頁 arrow 綠色短評 arrow 民主政黨就是按呢失去政權

民主政黨就是按呢失去政權 PDF Print E-mail
Thursday, 27 March 2008
真濟人看tioh8 chit遍總統大選e5結果,無法度瞭解,是按怎一個民主政黨會選輸一個早前ti7台灣威權統治、掠人關人刣人無數e5橫霸政黨咧?甚至問講台灣人teh想啥?是m7是台灣人無頭殼?抑是失去判斷e5能力? 咱若看東歐一寡早前e5共產國家,民主化了後e5幾遍大選,就比較khah會tang3瞭解其中e5緣故。咱來看chia e5國家,ti7一九八九年蘇聯共產集團崩盤以後e5各種發展情形。   波蘭ti7一九八九年七月國會議員選舉,團結工聯大贏,團結工聯e5人擔任總理,翻轉年一九九0年十二月華勒沙當選總統,五年後e5總統大選,政權就hou7舊共產黨改名換姓e5民主左翼聯盟提去。匈牙利原本e5共產黨ti7一九八九年放棄一黨獨裁,改名作社會黨、轉換作民主政黨,但是仝一年五月國會議員大選,青年民主聯盟變成第一大黨,in黨e5議長變作國家e5總理,二000年選出in黨e5頭人作總統,二00二年國會議員大選,社會黨及自由民主同盟就ka7政權提轉去。羅馬尼亞ti7一九八九年十二月反政府大示威,原本e5政權倒擔,總統及總統夫人攏hong5判刑,一九九0年選出原本共產黨書記做總統,連續當選兩任,一九九六年十一月競選第三任才輸去,才第一遍由m7是共產黨e5人做總統,做一任就倒去ah。保加利亞ti7一九九0年改作總統制、九一年制訂新憲法,非共產黨e5民主勢力同盟第一遍選贏大選,二00二年原本共產黨改名e5社會黨,ti7總統大選koh選贏,民主政黨執政無十年。   咱ui3東歐這幾個國家,看tioh8民主政黨攏做一兩任了後,政權就koh hou7原本e5共產黨提去。是按怎會按呢?因為,第一,新執政e5民主政黨完全無執政經驗,「m7曾作tioh8大家lak-lak-chhoah」;第二,人民對新政府期待傷懸,早前e5共產極權政府貪污腐敗是正常e5,新e5民主政黨政府當然tioh8清氣、而且tioh8絕對清氣、一點仔垃圾都be5使得;第三,新e5民主政黨政府干單拼掃舊政權留落來e5糞埽就拼到歸身軀汗,那有氣力做啥改革?改革做無夠好無夠濟、人民無滿意;第四,原本舊勢力各種組織嚴密e5勢力猶原足大。   台灣及東歐chia e5 hou7獨裁政權恐怖統治過e5國家真親像,不過台灣koh加一項是世界無e5,中國國民黨有幾百幾千億黨產,民進黨執政八年竟然無伊法。事實上,無論是地方首長、立法委員、抑是總統副總統選舉,任何一位m7是中國國民黨e7候選人猶未開始選就輸一大截去ah,那有公平?選會贏是非常非常無簡單neh。我認為這是中國國民黨ti7台灣選舉會選贏上重要e5原因!
 
< Prev   Next >