首頁 arrow 綠色短評 arrow 台灣當然需要潛水艦!

台灣當然需要潛水艦! PDF 列印 E-mail
發表者 李南衡   
2012/03/30, Friday
        無論是佇軍事上的自我防衛,抑是對兩岸將來談判,台灣攏需要潛水艦,按呢咱才有高度戰略談判的本錢“khó-jí-á”。問題是潛水艦beh ùi叼位來?潛水艦的來源只有兩種:是家己製造,tio̍h人買。

 

        咱台灣造船公司的造船技術會使講是世界水準,但是潛水艦是普通的船隻。會記得一九六0年代,蘇聯當chhèng的時陣,一寡東歐國家攏是受蘇聯威脅控制的共產國家,對蘇聯氣佇心肝底koh m̄敢放屁。消thháu苦悶唯一的方法就是講一寡政治笑話來keng-thé抑是phì-siù「偉大的」蘇聯。東歐bat流行一個政治笑話講:蘇聯的造船技術世界一的,一九五0年一隻蘇聯製造的原子潛水艦落水了後,一直匿佇水底十年ah免浮出水面。有夠厲害!

        三月十四,立法委員林郁芳質詢指出:台灣國際造船公司已經the̍h出潛水艦國造的計劃,只要政府若the̍htio̍h關鍵的技術,台船有信心兩年內造好第一隻國造的潛水艦。國防部長高華柱答詢講:咱愛顧tio̍h官兵的安全問題。因為「潛水艦m̄-nā愛會潛入去水底,mā tio̍h愛會浮起來啊!」高部長的意思是講,若無會kah偉大蘇聯的潛水艦仝款,匿佇水底十年浮出水面,tio̍h害了了ah!

        美國若無beh賣咱潛水艦的製造技術,免想講會使向第三國去引進。因為若無美國背書、抑是無由美國經手,咱所講的第三國chihbē-tiâu中國的壓力。台灣二月初才teh討論推動國造潛水艦,美國就透過管道設法beh瞭解詳情。

 

        Koh-khah要緊是,幾年前台船提報潛水艦國造的時有講:「戰鬥系統、聲納、魚雷等機密裝備攏無法度提供。」咱的問題m̄-nā製造潛艦技術轉移問題,武器裝備是控制佇少數幾個國家手內,tio̍h用國家的力量去the̍h。設使有法度解決製造潛艦的技術轉移問題、而且製造技術完全確認無問題,但是「非動力電子系統」(NPES),也就是潛水艦的任務裝備、抑是講戰鬥系統,需要美國支持協助。若無美國tìm頭,咱根本都無可能買tio̍h潛水艦必需的武器kah裝備。無武器裝備,一隻會chhàng的空殼船一點仔路用都無,加開錢創啥?

        Koh一種可能是去kâng買便的。上有可能就是美國買。舊年八月咱beh向美國買小小的F-16C/D都講kah無去,咱數想beh kā美國買幾隻上新的潛水艦,美國敢有可能賣咱?假使五角大廈真有可能建議美國總統賣咱潛水艦,美國國安會kah國務院敢tio̍h會同意?咱愛知影咱台灣現時的處境,比得台灣選舉:「選舉無師傅,用錢買tio̍h有。」特別是高科技的軍事裝備,有錢無地買!

        咱攏知,台灣當然需要潛水艦!問題是beh按怎變出來咧?

 

 
< 前一個   下一個 >