首頁 arrow 綠色短評 arrow 台灣人若koh恬恬,會死了了!

台灣人若koh恬恬,會死了了! PDF 列印 E-mail
發表者 李南衡   
2012/04/13, Friday
        你若the̍h一箍銅錢仔͘人,mài講大人無愛插你,連囡仔子mā bēthe̍h,因為一箍銀實在傷細圓,bē-tàng創啥。所以,你若假慷慨,發͘全台灣每一個人一箍銀,無人會感謝你,但是,你tio̍h開兩千三百萬,使講是小錢。甚至,你若發͘全台灣每一個人十箍,無人會感謝你,但是你敢有兩億三千萬hiah濟錢thang hō͘人?你破產都無夠賠。Chit-ê意思是講,你若全台灣每一個人the̍h十箍,你一聲tio̍h有兩億三千萬。世間那有chiah好的代誌?有,he就是「政府」!莫怪有hiah濟人拚死拚命beh開政府。雖然是按呢,政府mā tio̍h愛有撙節,若傷無撙節用硬搶的,政府tio̍h會變作有掛牌的土匪!

 

        咱用電費大起價來作例。台灣電力公司每年發電量大約是兩千億度,每一度若起一角銀,一年tio̍h增加收入兩百億。照新方案,用電第二級151度到330度起一成、一度起四角五,第三級331度至500度一度起八角四,第四級501度至700度一度起一箍三角三。按呢一聲tio̍h增加偌濟負擔?一家四口的家庭,平均每個月用電大約350度每個月tio̍h增加百一箍、熱人每個月tio̍h增加168箍,相當驚人。Koh khah恐怖的是經濟部授權台灣電力公司實施「浮動電價」,將來起價佇三箍以內,會使出在台灣電力公司調整起落,攏免得tio̍h啥人批准許可。經濟部講用電第一級的用戶有三成人,無起價,有照顧tio̍h弱勢者。事實上用電150度以下的家庭,你按怎(chi)mā掙無油,何必激kah足慈悲的款!

        超商、麵包店、餐廳等營業小商店,一起tio̍h起兩成以上,工廠、商場、學校、百貨等「工業用電」一起tio̍h起兩成半至三成半。民眾當然怨聲滿路。是按怎會起chiah雄?因為台灣電力公司舊年了錢了千外億。正常的公司了錢應該先檢討是按怎會了錢?那會了hiah濟?台灣電力公司破一孔烏lang-langkah hiah大孔,攏免檢討家己,了錢tio̍h kā電費起大價。台灣戇百姓有影tio̍h按呢出在伊chûi、據在伊刣?

        敢是台灣人傷古意,政府食了知滋味、食好鬥相報?台灣人聽tio̍h電費起大價tio̍h火真to̍h ah,別的國營事業煞總chhih-oá來,火上加油的有中油公司,油一立起三箍。啥物?健保費亦beh起價?大學學雜費亦beh起價?證所稅亦beh恢復徵收?你m̄-thang戇戇想講國營事業是政府,其實in那像是hit-ê烏道頭的細漢ē,替老大出面來劫錢。奇怪,看in按呢搶,那會無聽tio̍h消基會出來講按怎?

        五月二十,馬英九第二任總統就職hit工,台灣人一定tio̍h愛徛出來唱聲反對伊,台灣人若koh恬恬,會死了了!死kah chhoē無身屍!

 

 
< 前一個   下一個 >