首頁 arrow 綠色短評 arrow 馬英九搧家己的嘴phé!

馬英九搧家己的嘴phé! PDF Print E-mail
Written by 李南衡   
Friday, 04 May 2012
        三月,馬政府tio̍h直直喝油電beh雙雙起價,全台灣哀父叫母,四月初六馬英九接受《聯合晚報》專訪講:油電雙雙起價是必要的作法,「Chit-má無疼,以後會koh khah疼」。伊強調che是台灣脫胎換骨「轉大人」的時刻,koh khah是一條正確的道路,希望逐個多多忍耐。伊會照預定的五月十九,一遍tio̍h kā起夠額。

        一個月來,民生用品百項起,生活無分藍綠,所有的台灣人攏食伊消,第二任的四年總統猶未作tio̍h chiah悽慘,續落去的四年是beh按怎過咧?拄拄好原本的彰化縣鹿港鎮長王惠美當選立法委員,四月二八補選,鹿港人代替台灣人出氣,用選票教示馬英九,原本中國國民黨的王惠美當選鎮長the̍h八成外的選票,chit遍中國國民黨的候選人蔡明忠才the̍h九千零四十八票、無兩成九;民進黨提名的黃振彥the̍h兩萬兩千兩百七十五票、超過七成一,嬴一萬三千外票,民進黨頭一遍作鎮長。會使講是馬英九洗面,洗kah足工夫。

        無管專家學者按怎指出台電各種弊端,無管監察院beh彈劾失職弊端官員,無管人質疑是按怎ùi 2005年開始,台電趁錢變作了錢,幾年一了tio̍h歸千億?馬英九那像攏無聽tio̍h 。其實逐個的意見是要求馬英九電費慢且起,先診斷台電,掠出幾千億弊端改善了後,真有可能m̄-nā電價無需要起、顚倒落!弊端掠了若真正tio̍h起價才來起。可惜馬英九聽落去,伊完全知電費起價帶動百項物資起價,對人民生活影響偌大!伊掠準人民食消的是電費做一遍起。

        五月初一暗暝十點外,馬英九親身出馬來說明電價政策,改講無beh一遍五月十九起夠額,起價猶原beh照起,但是beh分作三遍起價,第一遍六月初十起原本beh起的四十葩,第二遍十二月初十起原本beh起的四十葩,chhun 的二十葩看台電的改革成果才決定beh按怎做。伊減算一遍六月初一夏季電價tio̍h起。馬英九原本講「Chit-má無疼,以後會koh khah疼。」改作驚你疼無夠,͘你疼四遍。因為聽講電費beh起,民生用品tio̍hteh等你,分四遍起明明是鼓勵百項物資起四遍,͘恁台灣人疼一下khah有咧!古早中國人誠殘忍,無beh一刀刣͘人死,一刀一刀割,͘伊疼煞,叫作「凌遲」。Chit遍逐個看tio̍h現代的中國人馬英九按怎殘忍凌遲台灣人!咱攏知影,半大人囝當teh大,序大人攏tio̍h kā補,助伊順利「轉大人」,馬英九thiau故意用油電kah百項物資起價,來壓台灣chit-ê半大人囝仔,「轉大人」轉過,會壓一下變作「成人」。

        馬英九搧家己的嘴phé,若猶知電價mài起偌要緊,咱tio̍h先罷免無顧台灣人死活的中國國民黨籍立法委員,馬英九若猶知驚,換罷免伊!

 
< Prev   Next >