首頁 arrow 綠色短評 arrow 連戰半路認賊作老父!

連戰半路認賊作老父! PDF Print E-mail
Written by 李南衡   
Friday, 11 May 2012
        五月初七,中國國民黨榮譽主席連戰接見中國湖北省省長王國生一行人,講in連家的老祖先bat佇湖北隋州作過官,前後有九代人,講伊將來一定會去隋州祭祖,續落去伊對湖北省來的訪客講,「今仔日m̄-nā是貴賓,也變成作父母官ah!」聽tio̍hhông起雞母皮、加忍損!堂堂一個中國國民黨榮譽主席竟然稱呼一個賊仔是「父母官」!

        咱bē-tàng隨便講人是賊仔。照五月初十《大紀元》報導,一位受害台商沈柏勝強調講,伊佇網路查tio̍h王國生個人資料,伊貪污四十八億美金、而且生活無檢點包飼六個「二奶」,chit號貪腐集團,卻beh來騙台灣人去中國大陸投資。若照沈柏勝講的按呢,貪污人民的錢當時是賊仔,而且是大賊!

        連戰講湖北省長王國生是伊的「父母官」,「父母官」chit-ê稱呼是按呢來的:中國西漢元帝(西元前75—33年)有一位南陽太守名叫作召信臣,佇伊管轄下唐河縣南七十里的湖陽鎮開一條大水圳到ta猶留tio̍h的「召父渠」,因為開水圳͘ 人民會tàng灌溉農田、解決in的痛苦,人民感覺伊親像老父疼子,尊稱伊是「老父」;六十年後的東漢(西元31年),仝一個南陽出另外一位太守杜詩,興水利疏浚舊圳,盡量減輕人民的稅賦kah減少調人民做公工,人民感謝伊,伊看作是家己的「老母」,kah早前hit位召信臣做夥阿老,講是「前有召父,後有杜母。」以後的人就將疼惜人民、照顧人民的官稱呼作「父母官」。

        枉費連戰是讀政治學的,而且是美國芝加哥大學政治學博士,完全知現代民主政治的意義,「民主」的意思是:人民才是主人,政府官員無論大細,攏總是人民的「公僕」,是beh來替人民做代誌、為人民服務的。連戰作過行政院青年輔導委員會主任委員、交通部長、行政院副院長、外交部長、台灣省主席、行政院長、副總統,做過二十幾年的大官,咱實在足懷疑伊心肝底是是一直想講伊是人民的「父母官」?

        若是西方的現代民主觀念連戰聽落去,咱提醒chit位「純種的中國人」,中國共產黨的老大毛澤東按怎講,老毛佇延安時代bat講:咱一切的工作人員,無論職位懸低,攏是人民的勤務員,咱所做的一切,攏是為人民服務。佇咱的人民共和國內面,人民是官的子民,in是國家的主人;官員是人民的「父母」,是人民的公僕。

        連戰你看台灣人無目地阮無法你,你若繼續知芳臭叫中國的省長「父母官」,你去北京tio̍h khah細膩一下,恁祖師公毛澤東會peh起來你搧嘴phé!

 
< Prev   Next >